அறிமுக இயக்குநர் திருஅருள் கிருஷ்ணன் எழுத்து மற்றும் இயக்கத்தில், ராஜன் தேஜேஷ்வர் தயாரித்து முதன்மைக் கதாபாத்திரத்தில் நடித்துச் சமீபத்தில் வெளியாகியுள்ள திரைப்படம் ‘அமரம்’ (Amaram). இதுவரை தமிழ் சினிமாவில் அதிகம் பதிவு செய்யப்படாத மலைக்கிராம விளிம்புநிலைச் சமூக மக்களின் வாழ்வியலையும், பழிவாங்கும் உணர்வுகளையும் ஆக்ஷன் மற்றும் கமர்சியல் பாணியில் விவரிக்க முயன்றுள்ள இத்திரைப்படம் தற்பொழுது பலத்த விவாதங்களை ஏற்படுத்தியுள்ளது.
கிழக்குத் தொடர்ச்சி மலையின் வறண்ட கிராமம் ஒன்றைச் சேர்ந்த நாயகன் ராஜன் தேஜேஷ்வர், வாழ்வாதாரப் பற்றாக்குறையின் காரணமாக, நாயகி ஐரா அகர்வாலின் தந்தையைக் கொலை செய்கிறார். தனது கண் முன்னால் நடந்த இந்தத் துயரத்திற்குப் பழிதீர்க்கும் நோக்கில், கொலையாளியைத் தேடி அந்த மலைக் கிராமத்திற்குள் நுழைகிறார் நாயகி ஐரா அகர்வால். அதன் பிறகு இருவருக்கும் இடையே அரங்கேறும் உணர்வுப்பூர்வமான மோதல்களே ‘அமரம்’ திரைப்படத்தின் மையக் கதையாகும்.
இத்திரைப்படத்தின் மூலம் விளிம்புநிலை மக்களின் வாழ்வியலைப் பேச இயக்குநர் எடுத்துக்கொண்ட முயற்சி பாராட்டப் பெற்றாலும், கமர்சியல் சமரசங்களுக்காகக் கையாளப்பட்ட சில காட்சிகள் பார்வையாளர்களை முழுமையாகத் திருப்திப்படுத்தத் தவறியுள்ளன.குறிப்பாக, பழங்குடியின மக்கள் தங்களது வாழ்வாதாரத்திற்காகச் செம்மரம் வெட்டுதல் மற்றும் கூலிப்படையாக மாறுதல் போன்ற சட்டவிரோதச் செயல்களில் ஈடுபடுவதைத் திரைக்கதையில் நியாயப்படுத்த முயன்றிருப்பது பார்வையாளர்கள் மத்தியில் கடுமையான கண்டனங்களை எழுப்பியுள்ளது. ஒரு சமூகத்தின் வாழ்வியலைப் பின்னணியாகக் கொண்டு, அதில் காதல், காமெடி மற்றும் ஆக்ஷன் போன்ற அம்சங்களை நேர்த்தியற்ற முறையில் கையாண்டதே படத்தின் பெரிய பலவீனமாகப் பார்க்கப்படுகிறது.
இப்படத்தின் மிக முக்கியப் பலமாக நாயகி ஐரா அகர்வாலின் துடிப்பான நடிப்பு அமைந்துள்ளது. தந்தையைக் கொன்றவனைத் தேடி அலையும் காட்சிகளிலும், அவனைக் கண்ட பின் கொலை செய்ய முடியாமல் தடுமாறும் எமோஷனல் காட்சிகளிலும் நேர்த்தியான நடிப்பை வெளிப்படுத்திப் பாராட்டுகளைப் பெற்றுள்ளார்.
முதல் படத்திலேயே பலம் வாய்ந்த கதாபாத்திரத்தை ஏற்றுள்ள நாயகன் ராஜன் தேஜேஷ்வர், உணர்வுகளை வெளிப்படுத்துவதில் இன்னும் கூடுதல் கவனம் செலுத்தியிருக்கலாம் என்பதே பொதுவான கருத்தாக உள்ளது.
பழங்குடியின சமூக மூத்தவராக வரும் ஜார்ஜ் மரியன், சாய் தீனா, எம்.எல்.ஏ-வாக நடித்திருக்கும் நாகினீடு மற்றும் ஹரிஷ் பெராடி, கல்கி ராஜன், வாசுதேவன் முரளி ஆகியோர் தங்களுக்குக் கொடுக்கப்பட்ட கதாபாத்திரங்களுக்குப் பொருத்தமான தேர்வாக அமைந்து தங்களது பங்களிப்பை வழங்கியுள்ளனர்.
ஒளிப்பதிவாளர் பரத் குமார் கிழக்குத் தொடர்ச்சி மலைக் கிராமங்களின் வறட்சியான நிலப்பரப்பையும், மக்களின் இயல்பான முகங்களையும் எதார்த்தமாகப் படம்பிடித்துப் படத்திற்குப் பெரும் பலம் சேர்த்துள்ளார். இத்திரைப்படத்தின் ஆக்ஷன் காட்சிகள் படமாக்கப்பட்ட விதம் மிரட்டலாக அமைந்துள்ளது.
இசையமைப்பாளர் மிக்கி ஜே. மேயர்: பின்னணி இசை ஓரளவிற்குத் த்ரில்லர் உணர்வைத் தந்தாலும், பாடல்கள் எதுவும் இப்படத்தின் இருண்ட கதைக்களத்திற்கு ஏற்றபடி அமையாமல் திரைக்கதையின் வேகத்தைக் குறைப்பதாக அமைந்துள்ளன.
மொத்தத்தில், கமர்சியல் சமரசங்களால் தடுமாறுகிறது அமரம்!
