கணம் .வித்தியாசமான படம். நேரத்தின் மேன்மை.

தமிழுக்கு டைம் ட்ராவலிங் படங்கள் புதிதல்ல என்றாலும் ‘கணம் ‘படத்தில் இடம் பெற்றுள்ள தாய்ப்பாசம் நம்மை ஈர்த்துக்கொள்கிறது.

உண்மையிலேயே  கடந்த காலத்துக்குள் செல்கிற ஆசை  நமக்கு அதிகமாகவே உண்டு. அது சாத்தியமில்லை என்பதால் கனவுகளில் கண்டு அனுபவிக்கிறோம்.

இந்த திரைப்படத்தில்  கால எந்திரத்துடன் வருகிற ஒருவர் நம்மிடமும் “நீ கடந்த காலத்துக்குள் செல்ல விரும்புகிறாயா ?”என்று கேட்கக்கூடாதா என்கிற தவிப்புடன்தான் கதைக்குள் கரைந்து விடுகிறோம்.

இசைக்கலைஞர்  ஆதி (ஷர்வானந்த்). வீட்டு ப்ரோக்கர்  பாண்டி (ரமேஷ் திலக்). திருமணத்துக்கு தீவிரமாக பெண் தேடிக்கொண்டிருப்பவர் கதிர் (சதீஷ்).  இந்த மூவரும் பள்ளிபருவத்திலிருந்தே  ஒன்றாக வாழ்கிறவர்கள். நல்ல நண்பர்கள்.இவர்களுக்கு பலவித ஆசைகள் ,தேவைகள்.!

காலம் கடக்கும் எந்திரத்துடன் வந்தவர் ,” நீங்கள் கடந்த காலத்துக்கு சென்று உங்கள் தேவைகளை நிறைவேற்ற நான் உதவி செய்கிறேன் “என்கிறார்.

அவரது கண்டிஷனுக்கு கட்டுப்பட்டு கால எந்திரத்தின் உதவியுடன் கடந்த காலத்துக்குள் புகுந்தவர்களால் நிகழ் காலத்துக்கு திரும்ப முடிகிறதா ,விளைவுகள் என்ன என்பதுதான் ‘கணம்’படத்தின் கதை.

இயக்குநர் ஸ்ரீ கார்த்திக் பார்வையாளர்களை வசியப்படுத்திவிடுகிறார் என்பதுதான் உண்மை.

98 காலக்கட்டத்தில் நடக்கும்  சம்பவங்கள்  பார்வையாளர்களுக்கு,   நன்றாகவே கனெக்ட் ஆகிறது. நிர்மா வாஷிங் பவுடர் விளம்பரம் இன்னமும் மனதுக்குள் விளையாடிக் கொண்டிருக்கிறது என்பதை காட்சிகளால் உணருகிறோம்.நல்ல அனுபவம். சொல்லப்படுகிற காட் சிகள், எதையுமே நகலெடுக்காத அசல்கள் என்பதால் ஒன்றிவிடுகிறோம் என்பது உண்மை.