தேவ் சினிமாஸ் பிரைவேட் லிமிடெட் தயாரிப்பில், அறிமுக இயக்குநர் ரா. ராஜ்மோகன் இயக்கத்தில் நடிகர் யோகி பாபுவின் 300-வது திரைப்படமாக உருவாகி வரும் ‘அர்ஜுனன் பேர் பத்து’ , வரும் நவம்பர் 27ஆம் தேதி உலகம் முழுவதும் உள்ள திரையரங்குகளில் வெளியாகவிருக்கிறது. இத்திரைப்படத்தில் யோகி பாபுவுக்கு ஜோடியாக பிரபல இளம் நடிகை அனாமிகா மஹி கதாநாயகியாகத் தமிழ் திரையுலகில் அறிமுகமாகிறார். இவர்களுடன் காளி வெங்கட், அருள்தாஸ், ‘அயலி’ மதன், சுப்ரமணியம் சிவா, மைனா நந்தினி, சௌந்தர்யா, சென்ட்ராயன், ஹலோ கந்தசாமி, பவா லட்சுமண் மற்றும் ரஞ்சன் குமார் உள்ளிட்ட முன்னணி நட்சத்திரங்கள் முக்கியக் கதாபாத்திரங்களில் இணைந்து நடித்துள்ளனர். மேலும், ‘மேற்குத் தொடர்ச்சி மலை’ படத்தின் புகழ்பெற்ற இயக்குநர் லெனின் பாரதியும் இத்திரைப்படத்தில் ஒரு மிக முக்கியமான கதாபாத்திரத்தில் நடித்துள்ளார் என்பது குறிப்பிடத்தக்கது.
மெலடி பாடல்களின் மன்னனான இசையமைப்பாளர் டி. இமான் இப்படத்திற்கு இசையமைத்துள்ளார். ‘தண்டகாரண்யம்’ படத்தின் மூலம் கவனிக்க வைத்த ஒளிப்பதிவாளர் பிரதீப் காளிராஜா ஒளிப்பதிவு செய்ய, காசி விஸ்வநாதன் படத்தொகுப்புப் பணிகளை மேற்கொண்டுள்ளார். அண்மையில் வெளியாகிப் பெரும் வரவேற்பைப் பெற்ற ‘அமரன்’ திரைப்படத்தின் கலை இயக்குநர் பி. சேகர் இப்படத்தின் கலை இயக்கத்தைக் கவனித்துள்ளார். அதிரடியான ஆக்ஷன் காட்சிகளை ஓம் பிரகாஷ் வடிவமைக்க, கே. நட்ராஜ் ஆடை வடிவமைப்பாளராகப் பணியாற்றியுள்ளார்.
இத்திரைப்படத்தின் ஒட்டுமொத்த படப்பிடிப்புப் பணிகளும் முழுமையாக நிறைவடைந்துள்ள நிலையில், திரையரங்கு வெளியீட்டை நோக்கிய இறுதிக்கட்டத் தொழில்நுட்பப் பணிகள் மிகவும் தீவிரமாக நடைபெற்று வருகின்றன. வரும் நவம்பர் 27ஆம் தேதி படம் திரையரங்குகளில் வெளியாகும் என்ற அதிகாரப்பூர்வ அறிவிப்பு தற்போதே ரசிகர்களிடையே மிகப்பெரிய எதிர்பார்ப்பை ஏற்படுத்தியுள்ளது. இதனைத் தொடர்ந்து, படத்தின் பிரம்மாண்ட ட்ரெய்லர் மற்றும் இசை வெளியீடு (Audio Launch) தொடர்பான அதிகாரப்பூர்வ அறிவிப்புகள் அடுத்தடுத்த வாரங்களில் படக்குழுவினரால் வெளியிடப்படும் எனத் தெரிவிக்கப்பட்டுள்ளது. யோகி பாபுவின் 300-வது மைல்கல் திரைப்படம் என்பதுடன், வாகனத் திருட்டு மாஃபியாவை மையமாகக் கொண்ட வித்தியாசமான கதைக்களத்தையும் கொண்டுள்ள ‘அர்ஜுனன் பேர் பத்து’, தியேட்டர்களில் ரசிகர்களைச் சந்திக்க முழு வீச்சில் தயாராகி வருகிறது.
