ப்ளு ஹில்ஸ் புரொடக்ஷன் மலர்க்கொடி முருகன், தயாரிக்கும் படம் ‘காதல் முன்னேற்ற கழகம்.’
இந்தப் படத்தில் இயக்குநரும், நடிகருமான பாண்டியராஜனின் மகன் ப்ரித்விராஜன் கதாநாயகனாக நடித்துள்ளார். நாயகியாக சாந்தினி நடித்திருக்கிறார். மற்றும் சிங்கம் புலி, கஞ்சா கருப்பு, கிஷோர்குமார், ‘நாதஸ்வரம்’ முனிஸ்ராஜா, அமீர் ஹலோ கந்தசாமி ஆகியோரும் நடித்துள்ளனர். முக்கிய கதாபாத்திரத்தில் நடிகர் சிவசேனாதிபதி நடித்திருக்கிறார்.
படம் பற்றி இயக்குநர் மாணிக் சத்யா பேசும்போது, “இந்தப் படம் 1985களில் நடக்கின்ற கதை. கதா நாயகன் நடிகர் கார்த்திக்கின் தீவிர ரசிகர்.அவரைப் போலவே முடியை வளர்த்துக் கொண்டு ரசிகர் மன்றம் அது ,இது என்று வேலைக்கு போகாமல் அலைந்து கொண்டிருப்பவர். சாந்தினி டீச்சராக இருப்பவர்.
துரோகத்தில் மிக கொடூரமான துரோகமாக கருதப் படுவது நம்பிக்கை துரோகம் தான்..
அதிலும் நட்புக்குள் நடக்கும் நம்பிக்கை துரோகம் மிக மிக கொடூரமானது… அதைத் தான் இதில் சொல்லி இருக்கிறோம். யதார்த்தமான கதையாக படம் வந்திருக்கிறது. கிராமப்புற வாழ்வியலை பதிவிட்டிருக்கிறோம்.. படத்தை பார்த்த பாண்டியராஜன் சார் பாராட்டியதுடன் 15நிமிட கிளைமாக்ஸ் காட்சிகள் நெருப்பு மாதிரி இருக்கிறது என்றார்.
சிவசேனாதிபதிதான் படத்தின் கதைக்கு முதுகெலும்பாய் ட்விஸ்ட் கேரக்டர் .
படம் விரைவில் திரைக்கு வர உள்ளது என்றார். இயக்குனர் மாணிக் சத்யா.
இந்த விழாவில் கலந்து கொண்டு பேசிய நடிகர் ஆரி தயாரிப்பாளர்களை ஒரு வாங்கு வாங்கினார்.
“பேட்ட கலெக்சன் அதிகமா,விஸ்வாசம் கலெக்சன் அதிகமா என்கிற விவாதம்தான் பலமாக நடக்கிறது.அந்த தயாரிப்பாளர்களுக்கு கலெக்சனில் போட்டி!
ஆனால் சினிமாவையே நம்பி பணத்தை போட்ட சிறு படத் தயாரிப்பாளர்கள் தோத்துக்கிட்டே இருக்கிறார்களே,அதற்கு என்ன தீர்வு?
சின்ன படங்களை வாழ விடுங்கள் என்று மேடைக்கு மேடை சொல்கிறோமே தவிர அந்த அளவுக்கு ஒரு வார அளவுக்காவது தியேட்டர்கள் கிடைக்கிறதா?வசூல் கிடைக்கிறதா?” என காரசாரமாக பேசினார் ஆரி.
