K Square Cinemas நிறுவனத்தின் பிரம்மாண்ட தயாரிப்பில், அறிமுக இயக்குநர் பலராம் கிருஷ்ணா இயக்கத்தில் உருவாகியுள்ள ‘நிறம்’ திரைப்படத்தின் டிரெய்லர் மற்றும் இசை வெளியீட்டு விழா சென்னையில் நடைபெற்றது. திரையுலகப் பிரபலங்கள், படக்குழுவினர் மற்றும் ஊடகவியலாளர்கள் முன்னிலையில் வெளியிடப்பட்ட இத்திரைப்படத்தின் டிரெய்லர், ரசிகர்களிடையே மிகப்பெரிய எதிர்பார்ப்பையும் ஏகோபித்த வரவேற்பையும் பெற்றுள்ளது. “Inspired from True Incidents” என்ற அடைமொழியுடன், நிஜ வாழ்க்கையில் நடந்த சில பரபரப்பான உண்மைச் சம்பவங்களை அடிப்படையாகக் கொண்டு, ஒரு அசாத்தியமான கிரைம் திரில்லர் திரைப்படமாக இக்கதைக்களம் வடிவமைக்கப்பட்டுள்ளது. இத்திரைப்படத்திற்குப் பிரபல இசையமைப்பாளர் டி. இமான் இசையமைத்துள்ளார் என்பது குறிப்பிடத்தக்கது.
விழாவில் கலந்துகொண்டு பேசிய இசையமைப்பாளர் டி. இமான்,
‘நிறம்’ திரைப்படத்தின் ஒரு பகுதியாகப் பணியாற்றியது தனக்கு மிகுந்த மகிழ்ச்சியளிப்பதாகத் தெரிவித்தார். இக்கதையைக் கேட்ட மாத்திரத்திலேயே, இதில் ஒரு வழக்கத்திற்கு மாறான வித்தியாசமான கிரைம் திரில்லர் ஒளிந்திருப்பதை உணர்ந்ததாகக் குறிப்பிட்ட அவர், இயக்குநர் பலராம் கிருஷ்ணா தனது முதல் படத்திலேயே ஒரு அனுபவமிக்க இயக்குநரைப் போல மிகுந்த தெளிவான பார்வையோடு காட்சிகளைச் செதுக்கியுள்ளார் எனப் பாராட்டினார். மேலும், படத்தின் கதாநாயகன் முகன், முக்கியக் கதாபாத்திரத்தில் நடித்துள்ள நிதின் சத்யா மற்றும் படத்தில் பங்களித்த அனைத்துக் கலைஞர்களும் தங்களின் கதாபாத்திரங்களை உணர்ந்து மிகச் சிறப்பாக நடித்துள்ளனர் என்றும், பாடலாசிரியர்கள் விவேகா, பா. விஜய், எடிட்டர் சாபு ஜோசப் உள்ளிட்ட தொழில்நுட்பக் குழுவினரின் கடின உழைப்பு படத்திற்குப் பெரும் பலம் சேர்த்துள்ளதாகக் கூறினார்.
தொடர்ந்து உணர்வுபூர்வமாகப் பேசிய இயக்குநர் பலராம் கிருஷ்ணா,
இன்று ஒரு இயக்குநராகப் பத்திரிகையாளர்கள் மற்றும் பொதுமக்கள் முன்னிலையில் நிற்பது தனது வாழ்க்கையின் மிகப்பெரிய கனவு நிறைவேறிய தருணம் என்று குறிப்பிட்டார். பல வருடங்களாக இந்த ஒரு நல்வாய்ப்புக்காகத் தான் காத்திருந்ததாகக் கூறிய அவர், தன் மீது முழு நம்பிக்கை வைத்த தனது குடும்பத்தினர், நண்பர்கள், தயாரிப்பாளர்கள் மற்றும் முழு படக்குழுவினருக்கும் தனது மனமார்ந்த நன்றிகளைத் தெரிவித்துக் கொண்டார். “நிறம்” என்பது ஒரு சாதாரண தலைப்பு அல்ல என்று விளக்கிய இயக்குநர், ஒவ்வொரு மனிதனின் மனநிலையும், குணமும், அவர்கள் சந்திக்கும் சூழ்நிலைக்கு ஏற்ப எப்படி மாறிக்கொண்டே இருக்கிறது என்ற சுவாரசியமான மாற்றங்கள்தான் இந்த படத்தின் மையக் கருத்து என்று விவரித்தார்.
நீண்ட இடைவெளிக்குப் பிறகு மீண்டும் தமிழ் சினிமாவில் ஒரு கதாநாயகனாகத் தங்களைச் சந்திப்பதில் மிகுந்த மகிழ்ச்சியடைவதாகப் படத்தின் நாயகன் முகன் தெரிவித்தார்.
‘நிறம்’ ஒரு வித்தியாசமான கிரைம் திரில்லர் என்று குறிப்பிட்ட அவர், இந்த படத்தில் நடிக்கத் தன் மீது நம்பிக்கை வைத்து வாய்ப்பு கொடுத்த இயக்குநர் பலராம் கிருஷ்ணாவுக்குத் தனது மனமார்ந்த நன்றியைத் தெரிவித்துக் கொண்டார். இயக்குநர் ஒவ்வொரு காட்சியையும் மிகுந்த கவனத்துடன் உருவாக்கியதோடு, படப்பிடிப்பின் போது தங்களுக்கு நிறையச் சுதந்திரம் கொடுத்துக் கதாபாத்திரங்களைச் சிறப்பாக வெளிப்படுத்த உதவினார் என்று பாராட்டினார். மேலும், இமான் சார் இசையில் நடிப்பது தனக்கு ஒரு கனவு நிறைவேறிய தருணம் என்றும், நிதின் சத்யாவுடன் பணியாற்றியது ஒரு நல்ல அனுபவம் என்றும் கூறிய அவர், தயாரிப்பாளர், தொழில்நுட்பக் குழுவினர், பாடகர்கள், பாடலாசிரியர்கள் என அனைவரும் இந்த படத்திற்காக மனதார உழைத்திருக்கிறார்கள் என்பதால் இப்படத்தைத் திரையரங்கில் பார்த்து ஆதரிக்குமாறு அன்புடன் கேட்டுக்கொண்டார்.
இத்திரைப்படத்திற்குச் சான்டோனியோ டெர்சியோ ஒளிப்பதிவு செய்துள்ளார். வி. ஜே. சாபு ஜோசப் படத்தொகுப்பை கவனிக்க, தினேஷ் சுப்பராயன் சண்டைக் காட்சிகளை அதிரடியாக வடிவமைத்துள்ளார். கலை இயக்கத்தைத் தாமோதரன் மேற்கொண்டுள்ளார். கே. பிந்து மாதவி பிரம்மாண்டமாகத் தயாரித்துள்ள இப்படத்தின் இணைத் தயாரிப்பாளராக பி. ராஜேஷ் பணியாற்றியுள்ளார். ‘நிறம்’ திரைப்படத்தின் அதிகாரப்பூர்வ வெளியீட்டு தேதி விரைவில் முறையாக அறிவிக்கப்படும் எனப் படக்குழுவினர் இம்மேடையில் தெரிவித்துள்ளனர்.
