தமிழ் திரையுலகில் நவீனக் கதைக் களங்களையும் குடும்ப விழுமியங்களையும் இணைத்துத் திரைப்படங்களை உருவாக்குவதில் ஒரு புதிய அலை வீசி வருகிறது. அந்த வகையில், முன்னணி நட்சத்திரங்களின் அசாத்திய கூட்டணியில் வெளியாகியுள்ள ‘விஸ்வநாத் அண்ட் சன்ஸ்’ திரைப்படம், மேல்தட்டுச் சமூகத்தின் ஆடம்பரப் பின்னணியில் மனித உணர்வுகளுக்கு இடையே நடக்கும் ஒரு சிக்கலான விவாதத்தை நம் கண்முன்னே நிறுத்துகிறது.
கதையின் நாயகனான சஞ்சு விஸ்வநாத், தனது தாயின் எல்லையற்ற அன்பில் திளைக்கும் ஒரு பெரும் கார்ப்பரேட் தொழிலதிபர். அம்மாவின் கனவை நனவாக்க ஒலிம்பிக் போட்டியில் தங்கப் பதக்கம் வெல்லும் அளவிற்குத் தாயின் மீது பக்தி கொண்டவராக விளங்கும் சஞ்சு, தனது தனிப்பட்ட வாழ்க்கையில் ‘திருமணம்’ என்ற பந்தத்திற்குள் மட்டும் நுழையக் கூடாது என்பதில் படு பிடிவாதமாக இருக்கிறார்.
வாரிசு இல்லாமல் குடும்பத்தின் பாரம்பரியம் அழிந்துவிடுமோ என்று ஏங்கும் தாயின் துயரத்தைத் துடைக்க, அவர் வாடகைத்தாய் முறை மூலம் ஒரு குழந்தையைப் பெற்றுக்கொள்ளும் மாற்று வழியைத் தேர்ந்தெடுக்கிறார். ஆனால், பிறந்த சில நாட்களேயான அந்தக் குழந்தையின் உயிருக்குத் திடீரென்று பேராபத்து ஏற்படுகிறது. குழந்தையைக் காப்பாற்ற வேண்டுமானால், அதற்கு அந்த வாடகைத்தாயின் ரத்த உதவி மட்டுமே ஒரே வழி என்ற இக்கட்டான சூழலில், சஞ்சு அந்தப் பெண்ணைத் தேடி அலைகிறார். இறுதியில், தங்களது குழந்தையைச் சுமந்தது தன்னைவிடப் பல வயதுகள் இளையவரான மமிதா பைஜு என்பதை அறியும்போது சஞ்சு அதிர்ச்சியின் உச்சத்திற்குச் செல்கிறார். பணத்திற்காக இந்த ஒப்பந்தத்திற்குச் சம்மதித்த மமிதா, குழந்தையின் நிலையை அறிந்து சஞ்சுவுடன் ஒரு பயணத்தைத் தொடங்குகிறார். நாட்கள் செல்லச் செல்ல மமிதாவுக்குத் தான் பெற்றெடுத்தக் குழந்தையின் மீதான தாய்ப்பாசம் மெல்லத் துளிர்விடுவதோடு, குழந்தையைக் காப்பாற்றத் துடிக்கும் ஒரு தந்தையாகச் சஞ்சுவின் பாசத்தைப் பார்த்து அவர் மீது காதல் வயப்படுகிறார்.
இந்தச் சிக்கலான உணர்வுப் போராட்டத்தை இயக்குநர் வெங்கி அட்லூரி மிகவும் தைரியமான கோணத்தில் கையாண்டுள்ளார். திருமண உறவு என்ற பொறுப்பு வேண்டாம், ஆனால் பெண்களுடனான தற்காலிக உல்லாசம் மட்டும் வேண்டும் என்ற நவீன மனநிலையுடன் பயணிக்கும் ஒரு ஆணின் பார்வையில் இந்தக் கதை சொல்லப்பட்டிருப்பது சற்று விவாதப் பொருளாக மாறினாலும், அதனை மேலோட்டமாகவும் ஜாலியான காமெடி கலந்த பாணியிலும் பேசியிருப்பதால் பார்வையாளர்கள் எளிதில் ஏற்றுக்கொள்ளும்படி காட்சிகள் அமைந்துள்ளன. குறிப்பாகப் படத்தில் இடம்பெற்றுள்ள, ‘மனிதர்களிடம் காட்டும் அளவுக்குப் அதிகமான கோபமும் வெறுப்பும் ஒரு கட்டத்திற்கு மேல் தங்களைத் தாங்களே சோர்வடையச் செய்துவிடும்’ என்ற வரிகளும், ‘எந்தவொரு குடும்பத்திலும் சண்டைகளால் மட்டும் உறவுகள் என்றுமே பிரிவதில்லை, அந்தச் சண்டைக்குப் பிறகு ஒருவருக்கொருவர் எப்படிப் பேசுவது என்று தெரியாமல் மௌனமாக இருப்பதால்தான் பிரிகிறார்கள்’ போன்ற எதார்த்தமான வசனங்கள் தியேட்டரை விட்டு வெளியே வந்த பிறகும் ரசிகர்களை ஆழமாக யோசிக்க வைக்கின்றன.
நடிகர்களின் பங்களிப்பைப் பொறுத்தவரை, சஞ்சு விஸ்வநாத் என்ற கதாபாத்திரத்தில் சூர்யா ஸ்டைலிஷாக வலம் வருவதோடு, தன் அம்மாவை நினைத்து அவர் உடைந்து அழுது உருகும் ஒரு குறிப்பிட்ட உணர்வுப்பூர்வமான காட்சியில் ஒட்டுமொத்தப் பார்வையாளர்களையும் கண்கலங்க வைக்கிறார்.
கதாநாயகி மமிதா பைஜு, தனது நிஜ வயதுக்கு ஏற்ற ஒரு துடிப்பான கதாபாத்திரத்தில், அமெரிக்க பாணியிலான ஆங்கில உச்சரிப்பையும், எதார்த்தமான தமிழையும் மிக அசால்டாகப் பேசி மகிழ்ச்சி, சோகம், காதல், வெட்கம் உள்ளிட்ட அனைத்து உணர்வுகளையும் மிக அழகாக வெளிப்படுத்தியுள்ளார்.
சூர்யாவின் அம்மாவாக நடித்திருக்கும் மூத்த நடிகை ராதிகா, தனது நீண்டகாலத் திரை அனுபவத்தால் காட்சிகளை இயல்பாக நகர்த்திச் செல்ல பெரிதும் உதவியிருக்கிறார். இவர்களுடன் இணைந்து ரவீனா டாண்டன், சுனில் ரெட்டி, ராஜீவ் மேனன் உள்ளிட்ட மற்ற கதாபாத்திரங்களும் திரைக்கதை ஓட்டத்திற்குப் பலமாகப் பயணித்திருக்கிறார்கள்.
தொழில்நுட்ப ரீதியாக, ஒளிப்பதிவாளர் நிமிஷ் ரவி தனது கேமரா மேஜிக்கால் ஒவ்வொரு காட்சியையும் மிகவும் பிரம்மாண்டமாகக் காட்சிப்படுத்தியுள்ளார். ஜி.வி.பிரகாஷ் குமாரின் இசையில் உருவாகியுள்ள பாடல்கள் அனைத்தும் மென்மையாகவும், பின்னணி இசை கதையின் உணர்வுகளுக்குத் தகுந்தாற்போல் மெலோடியாகவும் அமைந்து மனதை வருடுகின்றன. படத்தொகுப்பாளர் நவீன் நூலி சற்று மெதுவான திரைக்கதையாக இருந்தாலும், பார்வையாளர்களின் முழு கவனமும் ஒரு நொடி கூட சிதறாமல் திரையோடு ஒட்டிக்கொள்ளும் வகையில் காட்சிகளை மிகவும் சுவாரசியமாகத் தொகுத்து வழங்கியுள்ளார்.
ஒரு சில காட்சி நெருடல்களைத் தாண்டி, உறவுகளின் முக்கியத்துவத்தையும் தற்கால இளைஞர்களின் மனமாற்றத்தையும் அழகாகப் பேசியிருக்கும் இந்த ‘விஸ்வநாத் அண்ட் சன்ஸ்’ திரைப்படம், உலகெங்கிலும் உள்ள அனைத்துத் தரப்புக் குடும்பங்களும் திரையரங்குகளில் ஒன்றாக அமர்ந்து கொண்டாடுவதற்கான ஒரு பொழுதுபோக்குத் திரைப்படமாகும்.
