இந்தியன்2- படத்தை இயக்குநர் சங்கர் விரைவில் ஆரம்பித்துவிடுவார் என எதிர்பார்த்தவர்களுக்கு அவரின் தெலுங்குப்பட முதலாளி தில் ராஜு அதிர்ச்சி வைத்தியம் செய்வார் போலிருக்கிறது.
யோவ், என்னதான்யா நடக்குது? இப்படி எக்குத்தப்பா குத்துனா எப்படியா ? என்ன என்று கேட்கலாம் போல இருக்கிறது. எந்த நேரத்தில் படத்தை ஆரம்பித்தார்களோ தெரியவில்லை! ரத்தக்காவு வாங்கிக்கொண்டும் இழுத்தடிக்குது !
ராம்சரணின் தெலுங்குப் படத்தை பிப்ரவரி 10 ம் தேதி தொடங்குகிறோம் என அந்தப்படத்தின் தயாரிப்பாளர் தில் ராஜு அறிவித்திருக்கிறார்.இந்தப்படம் 2023 -பொங்கல் நாளன்று ரிலீஸ் ஆகும் என்பதாக அறிவித்திருக்கிறார்.இந்த படத்தின் மூன்றாவது ஷெடியூல் காக்கிநாடா ,ராஜமுந்திரி ஆகிய இடங்களில் நடக்கலாம்.
அப்படியானால் இந்தியன் 2 கதி?
இந்தியன் 2படம் முடிந்து தீபாவளிக்கு வெளியாகும் வகையில் முடித்துக்கொடுக்கப்படும் என்றார்களே,அந்த வாக்குறுதி என்னாச்சு?
காற்றோடு கலந்து விட்டதா?
போகிற போக்கினைப் பார்த்தால் விக்ரம் ரிலீசுக்குப் பிறகுதான் இந்தியன் 2-வில் உலகநாயகன் கமல்ஹாசன் கலந்து கொள்ள முடியும் போலிருக்கிறதே?
விவேக் இயற்கை அடைந்த பின்னர் அவரது கேரக்டரில் நடிப்பதற்கு நடிகர் குரு சோமசுந்தரம் தேர்ந்தெடுக்கப்பட்டிருக்கிறார்.இவர் விக்ரம் படத்திலும் இருக்கிறார். இவரது மலையாளப் படமான மின்னல் முரளியில் நல்ல பெயர் கிடைத்திருக்கிறது.
கதாநாயகியை பொருத்தவரை காஜல் அகர்வால் எப்போதோ விடைபெற்று சென்றுவிட்டார். இவருக்குப்பதிலாக தமன்னா நடிப்பார் என்று சொன்னார்கள். ஆனால் அவருக்கு தற்போது போதிய மார்க்கெட் வால்யூ இல்லை என்பதாக கருதுகிறார்கள். அதனால் திரிஷா நடிக்கலாம் என்கிற எதிர்பார்ப்பு இருக்கிறது. இவரிடம் போதிய அளவுக்கு கால்சீட் வாங்கலாம் என நம்புகிறார்கள்.
பாலிவுட் சண்டை நடிகர் வித்யுத் ஜமால் .சித்தார்த் ,பிரியா பவானி சங்கர் ,ஐஸ்வர்யா ராஜேஷ் ,ஆகியோரும் இந்தியன் 2 வில் இருக்கிறார்கள். வசனங்களை ஜெயமோகன் ,கபிலன் வைரமுத்து ,சரவணகுமார் ஆகிய மூவரும் எழுதி இருக்கிறார்கள். அநேக பகுதிகள் கமலின் ஆலோசனைப்படி திருத்தப்பட்டு இருக்கின்றன. இசை அனிருத் ,கேமரா ரவிவர்மன் ,எடிட்டர் ஸ்ரீகர் பிரசாத் , தயாரிப்பு வடிவமைப்பாளர் முத்துராஜ்.
லைகாவுக்கும் சங்கருக்கும் இடையேயான ஒப்பந்தம் முடிவடைந்த நிலையில் இருப்பதாகவும் சொல்கிறார்கள்.இது எந்த அளவுக்கு உண்மை என்பது தெரியவில்லை. இந்த பிப்ரவரிக்குள் விக்ரம் பட வேலைகள் முடிந்து விடும்.அதன் பின்னர் இந்தியன் 2 ஆரம்பமாக வேண்டும்.அதாவது ஆகஸ்டிலாவது தொடங்கவேண்டும்.பிரச்னைகள் சுமூகமாக நடந்தால் இது நடக்கும் என்கிறார்கள். பார்க்கலாம்.!!
