Dharma Durai is a 2016 Indian Tamil drama film directed by Seenu Ramasamy. The film stars Vijay Sethupathi and Tamannaah in the lead roles, with Aishwarya Rajesh, Srushti Dange, Raadhika Sarathkumar, Ganja Karuppu and Rajesh in supporting roles.
RATING;4/5.
‘நீர்ப் பறவை’படத்துக்குப் பிறகு கிட்டதட்ட நான்கு ஆண்டுகள் கழித்து சீனு ராமசாமி இயக்கியிருக்கும் படம் ‘தர்மதுரை’. ஒரு அண்ணன், ஒரு அக்கா, இரண்டு தம்பிகள்,பாசத்தை பொழியும் அம்மா பாண்டியம்மா(ராதிகா) ஆகியோரை கொண்டது எம்.பி.பி.எஸ்.படித்த டாக்டர் தர்மதுரையின் குடும்பம்.ஆனால் தர்மதுரை குடிப்பழக்கத்துக்கு ஆளாகி(ஜட்டியுடன் தனி அறையில் போட்டு பூட்டும் அளவிற்கு) எப்போதும் போதையில் மிதப்பவர். .குடிப் பழக்கத்துக்கு அடிமையானதால்,அவரால் தங்களின் மானம் மரியாதை போகிறது எனக்கூறி அவரை விரட்டி விட திட்டமிடுகின்றனர், ஆனால்,தர்மதுரைக்கு பாதுகாப்பு அரணாக நிற்கிறார்அம்மா ராதிகா. ஒரு கட்டத்தில் தர்மதுரை தங்களுடைய தொழிலுக்கு இடைஞ்சலாக இருப்பதாக கருதி அவரை ஒழித்துக் கட்ட திட்டமிடுகின்றனர் அவரின் சகோதரர்கள்.அம்மாவின் உதவியோடு அவர்களிடமிருந்து தப்பிக்கும் தர்மதுரை, தவறுதலாக அவரது சகோதரர்கள் சீட்டுத் தொழிலில் வசூலித்த எட்டு லட்ச ரூபாய் உள்ள பையை தன் துணிகளுடன் சேர்த்து எடுத்துக்கொண்டு வீட்டை விட்டு வெளியேறுகிறார். (பையில் பணம் உள்ள விஷயம் தர்மதுரைக்குத் தெரியாது.) வீட்டை வெறுத்து வெளியேறும் அவர் மதுரை மருத்துவக் கல்லூரியில் தன்னோடு படித்த சுபாஷினி (தமன்னா), ஸ்டெல்லா (சிருஷ்டி டாங்கே) ஆகியோரைத் தேடிப் புறப்படுகிறார். இவரிடம் சிக்கிக்கொண்ட பணத்தை மீட்பதற்காக அண்ணன் தம்பிகள் வலைவீசித் தேடுகின்றனர். இறுதியில் என்ன நடக்கிறது என்பதுதான் மீதிக்கதை.
வித்தியாசமான கதைக்களத்தோடு சாதாரண கிராமத்து மக்களின் வாழ்வியலை மிக அழகியல் கலந்து யதார்த்தமாகவும் உணர்வுபூர்வமாகவும் பதிவு செய்யும் சீனு ராமசாமி இப்படத்திலும் அதை மிக அனாசயமாக கையாண்டுள்ளார்.சபாஷ்! ஒரு அழகான காதல் கதை,கிராமப்புறங்களில் மருத்துவர்களின் பங்களிப்பு,‘வரதட்சணை’ என்ற பெயரில் ஏழைப் பெண்கள் படும் துயரம், எனப் பல விஷயங்களைப் பேசுகிறான் தர்மதுரை. அதே சமயம் ஃபிளாஷ்பேக் காட்சிகள் எப்போது முடியுமோ என்ற சோர்வையும் ஏற்படுத்துகிறது. நீளத்தை குறைத்து தவிர்த்திருக்கலாம். கல்லூரிக் காட்சிகளில் புதுமை எதுவும் இல்லை.விஜய் சேதுபதி நடிப்பில் வெளுத்து கட்டியிருக்கிறார்.அவரின் இயல்பான நடிப்பும், அப்பாவித்தனமான முகபாவனைகளும் அந்த கேரக்டருக்கு கனகச்சிதம். தர்மதுரை குடிகாரனாக மாறியதன் பின்னணி, தமன்னாவுக்கும் விஜய் சேதுபதிக்கும் இடையேயான நட்பு காதலாகும் காட்சி, அழகுகவிதை. பாண்டியம்மா ராதிகா கிழக்கு சீமையிலே படத்திற்கு பிறகு இப்படத்தில் கைதட்டல் பெறுகிறார். தமன்னா தான் ஒரு அழகு பதுமை மட்டும் இல்லை வலுவான கேரக்டர் கிடைத்தால் என்னால் நடிக்கவும் முடியும் என பல இடங்களில் சவால் விடுகிறார். கல்லூரி பேராசிரியராக வரும் நடிகர் ராஜேஷ் மனதில் நிற்கிறார் யுவன் ஷங்கர் ராஜாவின் இசை, படத்துக்குப் பெரிய பலம். ‘மக்கா கலங்குதப்பா’ பாடல் தனித்துவம் பெறுகிறது. வைரமுத்துவின் வரிகள் பளிச்சிடுகின்றன. சுகுமாரின் ஒளிப்பதிவு கண்களுக்கு குளிர்ச்சியூட்டுகிறது. மொத்தத்தில் ‘தர்மதுரை’ படத்தின் திரைக்கதையும், கேரக்டர்களும் திரையரங்கை விட்டு நாம் வெளியேறிய பின்பும் நம் நெஞ்சங்களை விட்டு விலக மறுக்கின்றனர்.
