இயக்குநர் ஆர். ராகவ் மிர்தாத் இயக்கத்தில், ஜி.எம். மோர்கன் பிலிம்ஸ் தயாரிப்பில், தமிழ் சினிமாவில் முற்றிலும் ஒரு புதிய முயற்சியாகத் திரையரங்குகளில் வெளியாகியுள்ள சர்ரியலிஸ்ட் ஃபேண்டஸி அறிவியல் த்ரில்லர் திரைப்படம் ‘டிரோன்ஸ்’. இப்படத்தில் சித்தி இத்னானி, அஞ்சலி நாயர், தேவதர்ஷினி, ‘பரிதாபங்கள்’ புகழ் டிராவிட் செல்வம், விஜய் டிவி குரைஷி, சினிமாவாலா சதீஷ், சசி செல்வராஜ் மற்றும் ஆர்.ஜே. தீபக் உள்ளிட்ட பலர் முக்கியக் கதாபாத்திரங்களில் இணைந்து நடித்துள்ளனர். ஜெயந்த் சேது மாதவன் ஒளிப்பதிவு செய்துளார். இசையமைப்பாளர் ஹரி எஸ்.ஆர். இசையமைத்துள்ளார்.
இத்திரைப்படத்தின் கதைக்களம் ஒரு விசித்திரமான அறிவியல் அமானுஷ்ய உலகத்திற்குள் நம்மை அழைத்துச் செல்கிறது. கதையின் படி, கல்லூரியில் படித்து வரும் மாணவர்களான ‘பரிதாபங்கள்’ புகழ் டிராவிட் செல்வம், அஞ்சலி நாயர் மற்றும் ஆர்.ஜே. தீபக் ஆகிய மூவரும் ஒரு காரணத்திற்காகக் கல்லூரியில் இருந்து இடைநீக்கம் செய்யப்படுகிறார்கள். இந்த விபரம் தங்களது பெற்றோர்களுக்குத் தெரிந்தால் பெரும் ஆபத்து ஏற்படும் என்று பயப்படும் அவர்கள், இந்த இடைநீக்கக் காலகட்டம் முடியும் வரை வீட்டை விட்டு வெளியே எங்காவது ரகசியமாகத் தங்க முடிவு செய்கிறார்கள். அப்படி அவர்கள் தேடிச் செல்லும்போது, அந்தப் பகுதியில் கைவிடப்பட்ட நிலையில் இருக்கும் ஒரு மர்மமான அறிவியல் ஆராய்ச்சிக் கூடம் (Science Lab) ஒன்றிற்குள் தற்காலிகமாகத் தஞ்சமடைகிறார்கள். ஆனால், துரதிர்ஷ்டவசமாக உள்ளே நுழைந்த சில மணி நேரங்களிலேயே அந்த விசித்திரமான ஆய்வகத்தின் கதவுகள் பூட்டிக்கொள்ள, அங்கிருந்து அவர்களால் மீண்டும் வெளியேற முடியாமல் உள்ளேயே மாட்டித் தவிக்கின்றனர்.
இந்த இக்கட்டான சூழ்நிலையில், அந்த அறிவியல் கூடத்திற்குள்ளேயே வசித்து வரும் ஒரு பேரழகியான இளம் பெண் சித்தி இத்னானியை அவர்கள் சந்திக்கிறார்கள். அவளது அழகில் மயங்கும் டிராவிட் செல்வத்திற்கும், சித்தி இத்னானிக்கும் இடையே அந்த ஆய்வகத்திற்குள்ளேயே ஒரு அழகான காதல் உருவாகி மெதுவாக மலர்கிறது. ஆனால், இவர்களது எதிர்பாராத இந்தக் காதலுக்குச் சித்தி இத்னானியின் பாட்டி (தேவதர்ஷினி) கடுமையான எதிர்ப்பு தெரிவிக்கிறார். இதற்கிடையே, காணாமல் போன இந்த மூன்று கல்லூரி மாணவர்களைத் தேடிக் கண்டுபிடிப்பதற்காகக் காவல் துறை அதிகாரியான சினிமாவாலா சதீஷ் அந்த அறிவியல் கூடத்திற்கு வருகிறார். ஆனால், அங்கு வந்த அவரும் சித்தி இத்னானியின் அழகைக் கண்டதும் தன் கடமையை மறந்து அவளது காதல் வலையில் விழுகிறார்.
இதன் பிறகுதான் கதையின் மிகப்பெரிய அமானுஷ்ய திருப்புமுனை அரங்கேறுகிறது. அந்தப் பேரழகி சித்தி இத்னானியின் வசீகரமான அழகிற்குப் பின்னால் ஊகிக்க முடியாத ஒரு பயங்கரமான ரகசியமும், சூனியக்காரி பின்னணியும் ஒளிந்திருப்பது அவர்களுக்குத் தெரிய வருகிறது. அந்த விசித்திர உண்மையை அறிந்த பின்பு, அவளைக் காதலிக்க மறுக்கும் ஆண்களின் நிலை என்ன ஆகிறது, அவர்கள் அந்த அறிவியல் கூடத்தின் மர்மப் பிடியில் இருந்தும், அந்தப் பாட்டியின் அமானுஷ்ய சக்திகளிடமிருந்தும் தப்பித்தார்களா இல்லையா என்பதே ‘டிரோன்ஸ்’ திரைப்படத்தின் கமர்ஷியல் மற்றும் சயின்ஸ் பிக்சன் நகைச்சுவைத் திரைக்கதையாகும்.
பழங்காலத்துப் பாட்டி கதைகளையும், பறக்கும் தட்டு (UFO) என்ற வேற்றுக்கிரகக் கற்பனையையும் தற்கால நவீன அறிவியலுடன் மிகச் சுவாரசியமாக இணைத்து இயக்குநர் ஆர். ராகவ் மிர்தாத் இந்தத் திரைக்கதையை எழுதியுள்ளார். அழகி, சூனியக்காரி, அறிவியல் ஆராய்ச்சி ஆகியவற்றுடன் சமுதாயத்தில் நிலவும் நிறவெறிக்கு (Racism) எதிரான கருத்துக்களையும் கலகலப்பான நகைச்சுவை பாணியில் சேர்த்து கொடுத்திருப்பதோடு, பார்ப்பவர்களைச் சிந்திக்க வைக்கவும் செய்துள்ளார்.
நடிப்பைப் பொறுத்தவரை, சித்தி இத்னானி மற்றும் அஞ்சலி நாயர் ஆகிய இருவரும் தங்களுக்குக் கொடுக்கப்பட்ட கதாபாத்திரங்களில் மிகச் சிறப்பான நடிப்பை வெளிப்படுத்தியுள்ளனர் . இவர்களுடன் இணைந்து நடித்துள்ள ‘பரிதாபங்கள்’ புகழ் டிராவிட் செல்வம் மற்றும் ஆர்.ஜே. தீபக் ஆகிய இருவருக்குமிடையே நடக்கும் கலாட்டாக்கள் தியேட்டரில் ரசிகர்களை விழுந்து விழுந்து சிரிக்க வைக்கின்றன. குரைஷி, தேவதர்ஷினி மற்றும் போலீஸாக வரும் சினிமாவாலா சதீஷ் ஆகியோரும் தங்களுக்குரிய பாத்திரங்களை எதார்த்தமாகச் செய்துள்ளனர்.
ஜெயந்த் சேது மாதவனின் ஒளிப்பதிவில் கேமரா உத்திகளும், ஹரி எஸ்.ஆர். அவர்களின் பின்னணி இசையும் படத்தின் ஃபேண்டஸி உலகத்திற்குள் பார்வையாளர்களை எளிதாக அழைத்துச் செல்கின்றன .
திரைக்கதையின் அமைப்பில், படத்தின் முதல் பாதி சில இடங்களில் சற்றே சுவாரசியக் குறைபாடுகளுடன் நகர்ந்து பார்வையாளர்களை லேசான சோர்வடையச் செய்தாலும், படத்தின் பிற்பாதியான இரண்டாம் பாதி யாரும் யூகிக்க முடியாத பல அதிரடித் திருப்பங்களுடன் நம்மை நிமிர்ந்து உட்கார வைத்து விடுகிறது.
இப்படம் ஒரு சில மேக்கிங் குறைபாடுகளையும் தாண்டிச் சிறுவர்கள் முதல் பெரியவர்கள் வரை கொண்டாடும் படியான ஒரு கலகலப்பான ஃபீல்குட் என்டர்டெய்னராக வெற்றி பெற்றுள்ளது.
