மொழி எல்லைகளைக் கடந்து தனித்துவமான கதைக் களம் கொண்ட திரில்லர் திரைப்படங்கள் எப்போதும் உலகளாவிய ரசிகர்களைக் கவர்ந்து, அவர்களின் மனதில் நீங்கா இடம் பிடித்துள்ளன. அந்த வரிசையில், ABS என்டர்டெய்ன்மென்ட்ஸ் (ABS Entertainments) நிறுவனத்தின் கீழ் S. அப்துல் பாசித் தயாரிப்பில், இயக்குநர் அஷ்ரஃப் இயக்கியுள்ள **”ஃபோட்டோகிராஃபர்” (Photographer)** திரைப்படம் ரசிகர்களைக் கட்டிப்போடத் தயாராகி வருகிறது.முன்னதாக ‘ரா’ (2014) திரைப்படத்தின் மூலம் தமிழ் சினிமாவில் தடம் பதித்த, பைலட் (Pilot) மற்றும் நடிகருமான அஷ்ரஃப் இந்தப் படத்தில் முதன்மை கதாபாத்திரத்தில் நடித்துள்ளார். இவருக்கு ஜோடியாக ஜனனி நடித்துள்ளார். மனிதனின் பேராசை, கடந்த காலத்தின் ரணங்கள் மற்றும் விவரிக்க முடியாத மர்மங்கள் ஆகியவற்றை உள்ளடக்கிய ஒரு அழுத்தமான ‘சைக்காலஜிக்கல் சர்வைவல் மிஸ்டரி திரில்லர்’ (Psychological Survival Mystery Thriller) திரைப்படமாக இந்தப் படம் உருவாகியுள்ளது.
இப்படத்தில் கருணாகரன், ஆடுகளம் நரேன், ‘உறியடி’ சிவா, தேவி மகேஷ், ஜே.பி. ஜெய், வேலா ராமமூர்த்தி, நிழல்கள் ரவி மற்றும் வெற்றிவேல் ராஜா உள்ளிட்ட முன்னணி நட்சத்திரப் பட்டாளம் இணைந்து நடித்துள்ளனர். இது கதைக்கு கூடுதல் பலத்தையும், விறுவிறுப்பையும் சேர்க்கிறது.
கதைக்களம்:
உலகில் தற்கென்றொரு அடையாளத்தை நிரூபிக்கப் போராடும், மன உளைச்சல் மற்றும் அதீத வெறி கொண்ட ‘வீரா’ என்ற புகைப்படக் கலைஞனைச் சுற்றியே இக்கதை நகர்கிறது. தனது திறமையை உலகிற்கு காட்ட வேண்டும் என்ற லட்சியத்தோடும், கடந்த காலத்தின் துயர நினைவுகளோடும், மதிக்கெட்டான் சோலை என்ற மர்மங்கள் நிறைந்த அடர்ந்த காப்பகக் காட்டுக்குள் நுழைகிறான்.
அங்கு, தனது வாழ்க்கையையே மாற்றக்கூடிய ஒரு அரிய இயற்கை நிகழ்வைப் புகைப்படம் எடுக்க முயல்கிறான். ஆனால், அவனது அந்த தேடல் ஒரு கட்டத்தில் அவனது உயிர் பிழைப்பிற்கான வேட்டையாக மாறுகிறது. நிஜத்திற்கும் பிரம்மைக்கும் இடையேயான எல்லை கோடு மறைய, அந்த காடு அவனுக்குள் இருக்கும் பயங்கரமான உண்மைகளை வெளிப்படுத்தத் தொடங்குகிறது. அதுவே படத்தின் விறுவிறுப்பான மீதிக்கதை.
தொழில்நுட்பக் குழு:
இப்படத்தின் தொழில்நுட்பக் குழுவில் ரயீஸ் அகமது (ஒளிப்பதிவு), ராஜ்குமார் சந்திரசேகரன் (இசை), ஆர்.சி. பிரணவ் (படத்தொகுப்பு) மற்றும் தினேஷ் சுப்பராயன் (சண்டைப் பயிற்சி) ஆகியோர் பணியாற்றியுள்ளனர்.இவர்களின் பங்களிப்பு படத்தின் திகிலூட்டும் பின்னணியையும், விறுவிறுப்பான சூழலையும் அடுத்த கட்டத்திற்கு எடுத்து சென்றுள்ளது.
விரைவில் திரையரங்குகளில் வெளியாகவுள்ள “ஃபோட்டோகிராஃபர்” ரசிகர்களுக்கு ஒரு புதிய திரையரங்க அனுபவத்தை கொடுக்கும் என படக்குழுவினர் நம்பிக்கை தெரிவித்துள்ளனர்.
