
தமிழ்த் திரையுலகில் தனது தனித்துவமான பாடல் வரிகளால் கவனம் ஈர்த்து வரும் பாடலாசிரியர் அருண் பாரதி, இசையமைப்பாளரும் நடிகருமான விஜய் ஆண்டனியின் இசையில் உருவாகியுள்ள ‘அப்பாக்குட்டி’ திரைப்படத்தில் இடம்பெறும் ‘ஏன் இந்த பெண்ணுக்கு லவ் வந்தது’ என்ற பாடலை எழுதியுள்ளார்.
விஜய் ஆண்டனி இசையமைப்பில் வெளியான ‘அண்ணாதுரை’ திரைப்படத்தில் இடம்பெற்ற ‘தங்கமா வைரமா’ பாடல் மூலம் பாடலாசிரியராகத் தனது திரைப்பயணத்தைத் தொடங்கிய அருண் பாரதி, தொடர்ந்து விஜய் ஆண்டனியின் இசையில் பல்வேறு திரைப்படங்களில் பாடல்களை எழுதி வருகிறார்.
இதுவரை ‘விஸ்வாசம்’ திரைப்படத்தில் ‘டங்கா டங்கா’, ‘தல்லே தில்லாலே’ போன்ற பாடல்களையும், ‘அண்ணாத்த’ திரைப்படத்தில் ‘வா சாமி’ பாடலையும், ‘பிச்சைக்காரன் 2’ திரைப்படத்தில் ‘கோயில் சிலையே நானா’, ‘புலுக்கு கள்ளூறும் பூவே’ போன்ற பாடல்களையும் எறும்பு திரைப்படத்தில் “ஒரு ஊருல எங்க வாழ்க்க” போன்ற பாடல்களையும் எழுதியுள்ளார்.
தொடர்ந்து முன்னணி இசையமைப்பாளர்களின் இசையில் பாடல் எழுதிவரும் அருண் பாரதி, தற்போது மீண்டும் விஜய் ஆண்டனி இசையில் ‘அப்பாக்குட்டி’ திரைப்படத்தின் மூலம் ரசிகர்களைச் சந்திக்கிறார்.
ஒரு இசையமைப்பாளரின் இசைப் பயணத்தில் அறிமுகமான பாடலாசிரியராகத் தொடங்கி, தொடர்ந்து அவரது இசையில் பல திரைப்படங்களில் பாடல்கள் எழுதிவரும் அருண் பாரதியின் இந்தத் தொடர் பயணம் திரையுலகில் கவனம் பெற்றுள்ளது.
‘அப்பாக்குட்டி’ திரைப்படத்தின் பாடல்களும் ரசிகர்களிடம் வரவேற்பைப் பெற்று வருகிறது.












