மகன் விஜய்யுடன் பிணக்கு என்றாலும் தன்னுடைய தொழிலில் கவனமுடன் இருந்து வருகிறார் இயக்குநர் எஸ்.ஏ.சந்திரசேகர்.
இவரது அரசியல் ஈடுபாடு தளபதிக்கு பிடிக்கவில்லை. ஆனால் அவரது ரசிகர்கள்
அரசியலுக்கு வந்தேயாகவேண்டும் என்பதில் ஆர்வமாக இருக்கிறார்கள்.
என்ன காரணமோ தெரியவில்லை ,தந்தை -மகன் பிரிவுக்கு புஸ்ஸி ஆனந்த் என்பவர்தான் காரணம் என்கிறார்கள். இவர் புதுச்சேரி முன்னாள் சட்டமன்ற உறுப்பினர்.இவரின் கைப்பிடியில் தற்போது விஜய் இருப்பதாக சொல்கிறார்கள்.
என்ன நடக்கிறது என்பது தந்தை -மகன் மட்டுமே அறிந்திருக்கிற உண்மை.
சரி விடுங்கள் என்ன நடக்கிறது என்பதை பார்க்கத்தானே போகிறோம்.ரத்த உறவு அற்றுப் போகுமா?
இயக்குநர் தற்போது என்ன செய்கிறார்?
நீதிக்கு தண்டனை, சாட்சி, சட்டம் ஒரு இருட்டறை, நான் சிகப்பு மனிதன் என சமூக சீர்கேடுகளை தன் எழுத்தின் மூலம் திரைப்படங்களில் துணிச்சலாக பிரதிபலித்தவர் .சந்திரசேகரன் .
மீண்டும் தனது புரட்சிகரமான கருத்துகளுடன் கதை, திரைக்கதை, வசனம் எழுதி இயக்கும் திரைப்படம் “நான் கடவுள் இல்லை” .
ஆளும் கட்சிகளுக்கு பிடிக்காத தலைப்பு.!
இதில் சமுத்திரகனி சி.பி. சிஐடி அதிகாரியாக நடிக்கிறார். இவருக்கு ஜோடியாக வாகை சூடவா, மௌனகுரு படத்தில் நடித்த நாயகி இனியா .
மற்றும் ஒரு துணிச்சல் மிக்க பெண் போலீஸ் அதிகாரியாக சாக்க்ஷி அகர்வால் நடிக்கிறார்.
வில்லனாக மிகவும் மிரட்டலான கதாபாத்திரத்தில் பருத்திவீரன் சரவணன் நடிக்கிறார்.
ஓய்வு பெற்ற வழக்கறிஞராக எஸ் ஏ சந்திரசேகரரும், அழுத்தமான அர்த்தமுள்ள கதாபாத்திரத்தில் நடிகை ரோகிணியும், ராணுவ அதிகாரி கதாபாத்திரத்தில் மயில்சாமியின் இரண்டாவது மகன் யுவனும் நடிக்கிறார்கள்.
மற்றொரு முக்கிய கேரக்டரில் அபி சரவணன் ஜோடியாக ப்ரியங்கா.
சமுத்திரகனியின் தாயாக மதுரையை சேர்ந்த மாயக்கா நடிக்கிறார். சமுத்திரகனியின் மகள்களாக டயானா மற்றும் ஷாஷாவும் நடித்திருக்கிறார்கள்
மகேஷ் கே.தேவ் ஒளிப்பதிவு செய்ய, “இதற்குத்தானே ஆசைப்பட்டாய் பாலகுமாரா” படத்தின் புகழ் சித்தார்த் விபின் இசையமைக்க, படத்தொகுப்பை பிரபாகரனும், கலையை வனராஜூம் கவனிக்கிறார்கள்.
“நான் கடவுள் இல்லை” படத்தை பற்றி இயக்குநர்சந்திரசேகரன் கூறியதாவது:
“குழந்தைகளை மையமாக வைத்து நான் இயக்கிய ஒரு குறும்படத்தை தற்செயலாக சமுத்திரகனி பார்த்தார். பார்த்துவிட்டு குறும்படத்தை பற்றி நெகிழ்ந்து பேசி பாராட்டினார். இதை பெரும் படமாக இயக்கும் எண்ணம் இருந்தால் தான் நடிப்பதாக தன் விருப்பத்தை தெரிவித்து இக்குறும்படத்தை பெரும்படமாக இயக்கும் எண்ணத்தை என்னூள் வித்திட்டார்.
சில நாட்களில் முழு நீள க்ரைம் த்ரில்லர் கதையாக மாற்றி அவரிடம் விரிவாக சொன்னேன், கதையை கேட்டவர் “சார் எத்தனை நாள் என்னுடைய டேட் வேண்டுமென்று” கேட்டதோடு இல்லாமல் தனது தமிழ், தெலுங்கு என தொடர் படப்பிடிப்புக்கு மத்தியில் இரவு பகல் பாராது ஒரே மூச்சில் இந்த படித்தில் நடித்துக்கொடுத்தார்” என்றார்.
மேலும் இத்திரைப்படம் சமுத்திரகனி அவர்களுக்கு வித்தியாசமான படமாக அமையும் என்றும் கூறினார். மேலும் அவரை ஒரு நடிகராக மட்டுமில்லாமல், அவருக்குள் இருக்கின்ற மனிதநேயமும் சமூக அக்கரையும் பாராட்டப்பட வேண்டியது என்றார்.
இதன் படப்பிடிப்பு முழுவதுமாக முடிந்து இறுதிக்கட்டப்பணிகள் நடந்துக்கொண்டிருக்கிறது.
