வித்தியாசமான கருத்து ,திரைப்பட ஆக்கம் ,சீர்திருத்தம் ,இவைகளின் மூளை ஆர்.பார்த்திபனிடம் மட்டுமே இருக்கிறது.
முன்னோடிகள் இருந்தாலும் கூடவே சமரசமாதலும் அவர்களிடம் இருந்தது. ஆனால் பார்த்திபன் சமரசமாகமாட்டார்,இழப்புகள் இருப்பது தெரிந்தாலும்.!
ஒத்த செருப்பு இவரது படைப்பு ,இரவல் வாங்காத சொந்த செருப்பு. உலக அளவில் பயணித்தது. பேட்டாவுக்கு கிடைக்காத பெருமை ,புகழ் அனைத்துலக படவிழாக்களில் பெற்றது .
இத்தகைய பெருமைகளுடன் மேலும் பல சிறப்புகளைப் பெற இதோ இன்னொரு படைப்பு.!
உலக திரை வரலாற்றில் முதல் முறையாக ஒரே ஷாட்டில் ‘நான் லீனியர்’ திரைப்படமாக உருவாகியுள்ளது இயக்குநர் இராதாகிருஷ்ணன் பார்த்திபனின் “இரவின் நிழல்”.
தமிழின் புகழை உலகம் பாடும் விதமாக உருவாகியுள்ள இப்படத்திற்கு, ஆஸ்கர் விருதுபெற்ற இசையமைப்பாளர் ஏ.ஆர்.ரஹ்மான் இசையமைத்துள்ளார்.
படத்தின் வெளியீட்டு பணிகள் விறுவிறுப்பாக நடந்து வரும் நிலையில், முதல் சிங்கிள் வெளியீட்டு விழா, பத்திரிகை ஊடக நண்பர்கள் முன்னிலையில் கோலாகலமாக நடைபெற்றிருக்கிறது .
இவ்விழாவினில் இலக்கிய எழுத்தாளர் இராமகிருஷ்ணன், முன்னாள் நீதிபதி சந்துரு, இயக்குநர் எழில், சசி, சமுத்திரகனி, த.செ. ஞானவேல், எழுத்தாளர் அஜயன் பாலா, ஒளிப்பதிவாளர் ரவி வர்மன் ஆகியோர் கலந்து கொண்டு படத்தின் சிறப்புக்களை பகிர்ந்து கொண்டிருக்கிறார்கள் .
இயக்குநர் கரு பழனியப்பன் கூறியாதவது…
“இந்த படம் எப்படி சாத்தியமாகும் என்ற சந்தேகமும், இதனை எப்படி தமிழில் எடுக்க முடியும் என்ற சந்தேகமும் எல்லாருக்கும் இருக்கும். மேலை நாடுகளில் மட்டுமே இது சாத்தியமாகும் என்ற சந்தேகம் இருந்த போது, இதை தமிழில் செய்ய பார்த்திபன் போன்ற ஒருத்தர் இருக்கிறார் என கூறுவதற்கான சாட்சியே இரவின் நிழல்.
ஏ ஆர் ரஹ்மான் இந்த படத்தில் பணியாற்ற வேண்டும் என அவர் எடுத்த முடிவு, தமிழ்நாட்டில் எல்லாம் சாதிக்க முடியும் என்பதை கூறுவதற்காகவே. படத்தில் பணியாற்றிய அந்த 200 பேருக்கும் பெரிய நன்றி கூறிகொள்ள வேண்டும். இந்த படத்தின் மேல் அவர்கள் வைத்த நம்பிக்கை தான் இந்த படத்தில் பார்த்திபன் பெற்ற முதல் வெற்றி.
பார்த்திபனின் படங்கள் அடுத்த தலைமுறைக்கு பெரிய உத்வேகமாக இருக்கும். இந்த படம் உங்களுக்கு ஒரு அனுபவமாக இருக்கும். எல்லா படங்களும் முதலில் குறை கண்டுபிடிப்பதற்காக இருக்கும், அதனை தாண்டி இந்த படம் உங்களுக்கு அனுபவமாக இருக்கும். இந்தியா புக் ஆப் ரெக்கார்ட்ஸ் மற்றும் ஆசியா புக் ஆப் ரெக்கார்ட்ஸ் ஆகியவை இந்த படத்தை சிங்கிள் ஷாட்டில் எடுக்கப்பட்ட முதல் நான் லீனியர் திரைப்படம் என அங்கீகரித்துள்ளது.”என்று பெருமை அடைந்தார் .
இயக்குநர் எழில் .,எழுத்தாளர் எஸ்.ராமகிருஷ்ணன் ,தயாரிப்பாளர் சுரேஷ் காமாட்சி ,முன்னாள் நீதியரசர் சந்துரு,எழுத்தாளர் அஜயன் பாலா,,பாடலாசிரியர் மதன் கார்க்கி ஒளிப்பதிவாளர் ரவி வர்மன் ,இயக்குநர் த செ ஞானவேல் ,இயக்குநர் சசி ,நடிகர் இயக்குநர் சமுத்திரகனி,மதன் கார்க்கி ஆகியோர் அவரவர் பாணியில் படத்தின் சிறப்புகளை எடுத்துச்சொன்னார்கள் .
இயக்குநர் இராதா கிருஷ்ணன் பார்த்திபன் பேசுகையில் ” ஏ ஆர் ரஹ்மானுடன் ‘ஏலேலோ’ படத்தில் வேலை செய்ய வேண்டியது. அந்த படம் நடக்கவில்லை. அவருடன் வேலை செய்ய 20 வருடம் காத்திருந்தேன்.
இந்தப்படம் அவர் இருந்ததால் மட்டுமே சாத்தியம். அவர் இருக்கும் தைரியத்தில் தான் இந்த முயற்சியை செய்தேன். இந்த முயற்சி செய்ய ஆரம்பித்த போது எல்லோரும் முடியாது என்றார்கள் ஏன் முடியாது என முயற்சித்தது தான் இந்தப்படம்.
இதன் கதை சொன்னவுடனே அவரே ‘பாவம் செய்யாதிரு மனமே’ என ஒரு சித்தர் பாடலை இசையமைத்து தந்தார். எப்படி படத்திற்கு முன்னதாக படத்திற்கு பொருத்தமாக ஒரு பாடலை தந்தார் என ஆச்சர்யமாக இருந்தது. இந்த கதைக்கு முழுக்க முழுக்க அவர் இசையால் உயிர் கொடுத்திருக்கிறார்., ஒரு பாடல் இருந்த இந்தப்படத்தில் ஆறு பாடல்கள் ஆகிவிட்டது. இந்தப்படம் ஒரு புது அனுபவமாக இருக்கும். எல்லோரது பாராட்டும் ஊக்கமும் தான் இந்தப்படம் எடுக்க காரணம் நன்றி.”என்று சுருக்கமாக சொல்லி முடித்தார்.
இசையமைப்பாளர் ஏ ஆர் ரஹ்மான் கூறியதாவது…
“இயக்குநர் பார்த்திபன் சொல்லி இந்த கதை கேட்டபோது பிரமிப்பாக இருந்தது. அவரிடம் சினிமா மீதான காதல் இன்னும் இருக்கிறது. அவர் இந்த ஐடியா சொன்ன போது பைத்தியகாரத்தனமாக இருந்தது. இவ்வளவு நன்றாக செய்வார் என நினைக்கவில்லை. மிக நன்றாக எடுத்தார். நான் ஒரு படம் எடுத்தேன் 99 சாங்ஸ் ஆனால் அதை சரியாக ரிலீஸ் செய்ய முடியவில்லை. இந்தப்படம் எடுக்கும்போது ஷீட்டிங் ஸ்பாட்டில் எப்படி எடுக்கிறார்கள் என பார்த்தேன் பிரமிப்பாக இருந்தது. இந்தப்படம் வெளிநாட்டில் வெளியாகி இருந்தால் கொண்டாடி இருப்பார்கள் பரவாயில்லை இங்கு தமிழ் நாட்டில் கொண்டாடுவோம்.”என்று தன்னுடைய ஆதங்கத்தையும் பதிவு செய்து விட்டார்.
