உறைந்து போனோம் .. இல்லம் திரும்பிய பின் ஒரு குளியல்.!
நல்ல வேலை .. சொக்காயில் ரத்தக்கறை எதுவும் இல்லை. கலவர ஏரியாவில் புழங்கி விட்டு வந்த எபெக்ட் !
“ய ம்மா .. எம் மேல ஏதாவது வாசம் ,கீசம் அடிக்கிது? “
“இல்லீங்க “சகதர்மிணி சொன்ன பின்னர்தான் நிம்மதியாக இருந்தது. கஞ்சா ,சரக்கு வாசம் எதுவும் இல்லை. பைட் கிளப் படம் இந்த அளவுக்கு பாதிப்பை ஏற்படுத்தி இருந்தது.
வட சென்னை என்றாலே தமிழ்ச் சினிமா எதையெல்லாம் காட்டுமோ அவை எல்லாமே இந்தப்படத்தில் இருக்கிறது.
வருங்கால தலை முறை உருப்படியா ,நல்லா இருக்க வேண்டும் என்பதற்காக ஒருவர் பாடு படுகிறார்.விளையாட்டு ,வேலை வாய்ப்பு என்று வாலிபர்களை கொண்டு செல்கிறார். இவருக்கு பக்க பலமாக இருக்கிறார் உறியடி பட ஹீரோ விஜயகுமார்.! நினைத்தது நடந்ததா ?
இயக்குநர் அப்பாஸ் எ ரகமத் அழுத்தம் கொடுத்து சொல்லி இருக்கிறார். நாயகனாக நடித்திருக்கும் உறியடி விஜயகுமார் இந்த படத்தில் அந்த கேரக்டராகவே வாழ்ந்திருக்கிறார் । கட்டான உடல், கனமான குரல், சண்டைக் காட்சிகளில் நெருப்புப் பொறி . பாடி லாங்குவெஜ் பக்க பலம். ஆழமான காதல் காட்சிகள் குறைவாகவே இருந்தாலும் நிறைவான நடிப்பு.
நாயகியாக மோனிஷா மோகன் . அழகு. அளந்து வைத்திருக்கிறார்கள் இவருக்கான சீன்களை.!
அவினாஷ் ரகுதேவன் மற்றும் சங்கர்தாஸ் இருவரும் நட்பு,துரோகம் இரண்டுக்கும் உதாரண புருஷர்கள். .கதையின் மய்யமாக இவ்விருவரும் படத்துக்குப் பலம் சேர்த்திருக்கிறார்கள்.
கார்த்திகேயன் சந்தானம்.குத்துச்சண்டை வீரர் . இவருடைய தோற்றமும் நடிப்பும் பக்காவாக அமைந்திருக்கிறது.
இடறி விழுந்தால் சண்டைக் காட்சிகள் . இதில் திறமையைக் காட்ட விதவிதமான கோணங்களில் படமாக்கி இருக்கிறார் ஒளிப்பதிவாளர் பிரிட்டோ.நல்ல விருந்து ரசிகர்களுக்கு.!
கோவிந்த்வசந்தாவின் இசையில் பாடல்கள் சுகம்..ராஜா ஆங்காங்கே தெரிகிறார்.
விக்கி, அம்ரின் அபுபக்கர் ஆகிய இரண்டு சண்டைப்பயிற்சி இயக்குநர்களும் போட்டியிட்டுக்கொண்டு காட்சிகளை அமைத்திருக்கிறார்கள் .
லோகேஷ் கனகராஜ் வெளியிட்டிருக்கிற இந்தப்படம் வட சென்னை ,நாகர்கோவில் என்கிற ஏரியாக்களை நினைவு படுத்துகிறது.
–தேவிமணி
