தமிழ்த்திரையுலகின் ‘டாப்’ நடிகர்களில் ஒருவராக வலம்வரும் சிவகார்த்திகேயன் தனது ரசிகர் மன்ற நிர்வாகிகளை சந்திக்கும் நிகழ்ச்சி சென்னையில் நடந்தது. தமிழகம் முழுவதிலும் உள்ள நிர்வாகிகள் கலந்துகொண்ட இந்நிகழ்வில் பேசிய சிவகார்த்திகேயன், “நானும், விஜய் சேதுபதியும் எந்த சினிமா பின்புலமும் இல்லாமல் நடிகராக வந்துள்ளோம். நான் சாதாரண மிமிக்கிரி ஆர்ட்டிஸ்ட், தொகுப்பாளராக இருந்து நடிகராக வர முடியாது என சொன்னவர்கள் மத்தியில் இதை சாதித்து காட்டி இருக்கிறேன்.நான் மக்களால் உருவாக்கப்பட்ட நடிகன் . மக்கள் இல்லாமல் இந்த நட்சத்திர அந்தஸ்து சாத்தியமாகியிருக்காது,
முதலில் நம்முடைய நோக்கம் என்ன என்பதை நாம் தெளிவாகப் புரிந்துகொள்ள வேண்டும். அதில் நாம் தெளிவாக இருக்க வேண்டும். விமர்சிப்பவர்கள் எப்போதும் விமர்சித்துக் கொண்டுதான் இருப்பார்கள். ஆனால், நாம் அனைவரும் அன்பினால், அன்புக்காக ஒன்றாக இருக்கிறோம். நன்றாக படியுங்கள். நன்றாகச் சம்பாதியுங்கள். முதலில் குடும்பம்தான் முக்கியம். தினமும் 15 நிமிடங்களாவது புத்தகங்களைப் படியுங்கள். படிக்க, படிக்க நம் சிந்தனை மேம்படும். அது, சமூக வலைதளங்களிலிருந்து விலகியிருக்க மாற்றாகவும் இருக்கும்..” எனத் தெரிவித்துள்ளார்.
நடிகர் விஜய், தனது ரசிகர்கள் மன்றங்களை முறையாக கட்டமைத்து, அரசியலுக்கு வந்து முதலமைச்சராக மாறியுள்ள நிலையில்,சமீப காலமாக நடிகர்கள் தனுஷ், சூர்யா ஆகியோர் தங்களது ரசிகர் மன்ற நிர்வாகிகளை அழைத்துத் தொடர் கூட்டங்களை நடத்தி,பல்வேறு நலத்திட்ட நிகழ்வுகளையும் மேற்கொண்டு வருகின்றனர்.இந்நிலையில், தற்போது நடிகர் சிவகார்த்திகேயனும் மாநிலம் தழுவிய அளவில் 2000-க்கும் மேற்பட்ட நிர்வாகிகளைத் திரட்டி மாநாடு பாணியில் இத்தகைய ஆலோசனைக் கூட்டத்தை நடத்தியிருப்பது அரசியல் நோக்கர்கள் மத்தியில்,மிகுந்த கவனத்தைப் பெற்றுள்ளது.
