எழுத்து இயக்கம் : கார்த்திக் நரேன் ,பிரசன்னா ,இசை :ஜேக்ஸ் பிஜாய் ,ஒளிப்பதிவு ; கோகுல் பினாய் ,தயாரிப்பு : லைகா சுபாஷ்கரன் .
ஸ்டைலிஷ் அருண் விஜய் ,பிரசன்னா ,பிரியா பவானி சங்கர் .
************
திரை உலகத்துக்கு வந்து 25 ஆண்டுகளை தொட்டிருக்கிறார் ஸ்டைலிஷ் அருண் விஜய். இது ஒரு சாதனை.வாழ்த்துகள்.
முன்னணி ஹீரோக்களுடன் இணைந்து நடித்தும் ,தனித்து ஹீரோவாக நடித்தும் பல வெற்றிப்படங்களைக் கொடுத்தவருக்கு ‘மாஃபியா சாப்டர் ஒன் ‘ ஸ்டைலிஷ் ஆக்டர் என்கிற சிறப்பை தந்திருக்கிறது.இந்த படத்தைப் பொருத்தவரை கலை நயம், நேர்த்தியான காட்சிகள் சிலரின் நடிப்பு மேலோங்கி இருக்கிறது .
படம் எப்படி?
துருவங்கள் 16 என்கிற சிறப்பான படத்தைக் கொடுத்தவர் கார்த்திக் நரேன். போதைப் பொருள் உலகம் என்பது கண்டங்கள் கடந்து இயங்குகிற உலகளாவிய தனித்த உலகம். நச்சுப் பொருளை விதைத்து கோடிகளில் புரள்கிறவர்களது சொர்க்கம்.இதை மையமாக வைத்து மற்றொரு கவுதம் மேனனாக மாறுவதற்கான முயற்சியோ ?கார்த்திக் நரேன் தனது ஸ்டைலை விட்டுக் கொடுக்கவில்லை.என்றாலும் அப்படி ஒரு எண்ணம் வராமல் இல்லை.
அதன் வேரை அறிந்து அடியோடு ஒழிக்க வேண்டும் என்பதுதான் நார்காடிக் பீரோவின் நோக்கம், இதனுடைய தலைமை அதிகாரி சுட்டுக் கொல்லப்படுகிறார். சுட்டது யார் ,அந்த கூட்டத்தின் தலைவன் யார் என்பதை கண்டறிந்து கைது செய்ய வேண்டும் என்கிற முனைப்புடன் சக அதிகாரிகளுடன் இறங்குகிறார் அருண் விஜய்.
112 நிமிடம்தான் படத்தின் நீளம் என்றாலும் கதை நத்தை வேகத்தில் நகருகிறது. முதல் பாதி அற்புதமான படப்பிடிப்பு , பின்னணி இசை , இவைகளினால் கடந்து செல்கிறது. மொத்தப்படத்தையும் தாங்கி நிற்பது இவைகள்தான்.! ஜேக்ஸ் பிஜாயின் ஒளிப்பதிவு ,கோகுல் பினோயின் இசை அருண் விஜய்யின் நடிப்பு பாராட்டியே ஆகவேண்டும். பிரசன்னா வுக்கு முரட்டுத் தனமான கேரக்டர்.வசனத்தின் வழியாக மிரட்டுகிறார்.
ஆனால் இவர்களின் உழைப்புக்கு ஏற்ற கதை இல்லை.
சத்யாவாக வருகிற பிரியா பவானி சங்கருக்கு பதிலாக யாரோ ஒரு அழகிய துணை நடிகையை போட்டிருந்தாலும் தப்பில்லை. வந்து போவதற்கு பி.ப.ச.தான் வேண்டுமா என்ன?
ஜேக்ஸ் பிஜாயின் ஒரு பாடல் நிச்சயம் ஹிட் அடிக்கும்.
மா ஃ பியா …சினிமா முரசத்தின் மார்க் .2 / 5
