தமிழ் திரையுலகில் பெரும் எதிர்பார்ப்பை ஏற்படுத்தியுள்ள ‘ராஜாஸ் பிளேலிஸ்ட்’ (Raja’s Playlist) திரைப்படத்தின் முழு படப்பிடிப்பும் வெற்றிகரமாக நிறைவடைந்து, தற்போது போஸ்ட் புரடெக்ஷன் பணிகள் விறுவிறுப்பாகத் தொடங்கியுள்ளன. எலிஃபன்டைன் எக்ஸ் (Elephantine X) நிறுவனத்தின் தயாரிப்பில் உருவாகும் இத்திரைப்படத்தின் மூலம் மறைந்த மூத்த தயாரிப்பாளர் ஆர்.டி. பாஸ்கரின் இளைய மகனும், இசைஞானி இளையராஜாவின் சகோதரர் மகனுமான ஜெயன் கதாநாயகனாக தமிழ் சினிமாவில் கால் பதிக்கிறார். குடும்ப உறவுகளையும் இசையின் ஆற்றலையும் மையமாகக் கொண்டு ஒரு பக்கா மியூசிகல் ஃபேமிலி என்டர்டெய்னராக இத்திரைப்படம் செதுக்கப்பட்டு வருகிறது.
மறைந்த தயாரிப்பாளர் ஆர்.டி. பாஸ்கர் மற்றும் அவரது குடும்பத்தின் மீதான நீண்டகால நட்பிற்கு மதிப்பளிக்கும் வகையில், கோலிவுட்டின் முன்னணி ஜாம்பவான்கள் இத்திரைப்படத்திற்காக கைகோர்த்துள்ளனர். ஆர்.டி. பாஸ்கருடனான அந்த ஆழமான நட்பின் அடையாளமாக இத்திரைப்படத்தைத் தயாரிப்பாளர் ரமணன் பாலகங்காதரன் தயாரித்துள்ளார். தமிழ் சினிமாவின் முன்னணி கமர்ஷியல் இயக்குனர் வெங்கட் பிரபு இத்திரைப்படத்திற்கு கதையமைக்க, இசை இளவரசன் யுவன் சங்கர் ராஜா இசையமைத்துள்ளார். மேலும், தேசிய விருது பெற்ற இயக்குனர் சுதா கொங்கரா கிரியேட்டிவ் தயாரிப்பாளராகப் (Creative Producer) பங்களித்து படத்திற்கு மிகப்பெரிய பலம் சேர்த்துள்ளார்.
‘குடும்பஸ்தன்’ திரைப்படத்தின் மூலம் விமர்சன ரீதியாகப் பாராட்டுகளைப் பெற்ற ஒளிப்பதிவாளர் சுஜித் என். சுப்ரமணியம், வெங்கட் பிரபுவின் கதையைத் தழுவி திரைக்கதை எழுதி இத்திரைப்படத்தின் மூலம் இயக்குநராக அறிமுகமாகிறார்.படப்பிடிப்பு நிறைவு குறித்துத் தயாரிப்பாளர் ரமணன் பாலகங்காதரன் பேசுகையில், இந்தத் திரைப்படத்தின் படப்பிடிப்பை முடித்திருப்பது தங்கள் ஒட்டுமொத்தக் குழுவிற்கும் மிகவும் நெகிழ்ச்சியான மற்றும் மனநிறைவான ஒரு தருணம் என்று குறிப்பிட்டார். ஒரு அழகான கதையை உருவாக்கப் படக்குழுவின் ஒவ்வொரு உறுப்பினரும் மிகுந்த அர்ப்பணிப்புடன் உழைத்துள்ளனர் என்றும், ஜெயன் தனது அறிமுகப் படத்திற்காகத் தனது முழு உழைப்பையும் தந்துள்ளதால் ரசிகர்கள் அவரை மனதார வரவேற்பார்கள் என்ற நம்பிக்கை தனக்கு முழுமையாக இருக்கிறது என்றும் நெகிழ்ச்சியுடன் தெரிவித்தார்.
தற்போது பின்-தயாரிப்பு பணிகளைத் தீவிரமாகத் தொடங்கியுள்ளதாகவும், குடும்ப உறவுகள், உணர்வுகள் மற்றும் இசையின் ஆற்றலைக் கொண்டாடும் ஒரு நல்ல திரைப்படமாக இதை மக்களுக்குக் கொண்டு சேர்ப்பதில் தாங்கள் மிகுந்த மகிழ்ச்சியடைவதாகவும் அவர் மேலும் பகிர்ந்து கொண்டார்.இத்திரைப்படத்தில் புதுமுக நாயகன் ஜெயனுடன் இணைந்து சோனா ஒலிகல், வாகை சந்திரசேகர், குரு சோமசுந்தரம், ரோஜு, பிபியன், ஆர்யா லக்ஷ்மி, பிரகதீஸ்வரன் பூபாளம், இந்துமதி, ரேஷ்மி, ரஜினாத், ராம்குமார், மீனா மற்றும் திலகவதி உள்ளிட்ட பல திறமையான நட்சத்திரங்கள் முக்கியக் கதாபாத்திரங்களில் நடித்துள்ளனர். தற்போது படத்தின் முழு படப்பிடிப்பும் வெற்றிகரமாக முடிவடைந்துள்ள நிலையில், படத்தின் பாடல்களுக்கான இசைக்கோர்ப்பு, எடிட்டிங் மற்றும் கலரிங் உள்ளிட்ட அதிநவீன தொழில்நுட்பப் பின்-தயாரிப்பு பணிகள் ஸ்டுடியோக்களில் மிக விறுவிறுப்பாக நடைபெற்று வருகின்றன.
