ஐக்கிய நாடுகள் சபையில் தமிழக எம்பி, எல்.கே. சுதீஷ் : உலக பருத்தி தினத்தில் இந்தியாவின் ஜவுளித்துறை சாதனை குறித்து உரை!
அக்டோபர் 7 உலக பருத்தி தினத்தை (World Cotton Day) முன்னிட்டு, அமெரிக்காவின் நியூயார்க்கில் உள்ள ஐக்கிய நாடுகள் சபை (UN) தலைமையகத்தில் ‘நிலைத்தன்மைக்கான பருத்தி: வாழ்வாதாரம், மதிப்புக்கூட்டல் மற்றும் கூட்டாண்மை’ என்ற கருப்பொருளில் ஒரு பிரத்யேகக் கருத்தரங்கம் நடைபெற்றது. ஐக்கிய நாடுகள் சபைக்கான இந்தியா மற்றும் மாலி ஆகிய நாடுகளின் நிரந்தரத் தூதரகங்கள் இணைந்து நடத்திய இம்மாபெரும் சர்வதேச நிகழ்வில், உலகளவில் பருத்தியின் பொருளாதார மதிப்பு, ஆடை உற்பத்தி மற்றும் அதன் மூலம் கோடிக்கணக்கான எளிய மக்களின் வாழ்வாதாரத்தை மேம்படுத்துவது குறித்து ஆழமான விவாதங்கள் நடைபெற்றன.
இந்நிகழ்ச்சியில் இந்திய நாடாளுமன்ற உறுப்பினர்கள் மற்றும் பல்வேறு சர்வதேச அமைப்புகளின் முக்கியப் பிரதிநிதிகள் கலந்துகொண்டு தங்களது கருத்துக்களைப் பதிவு செய்தனர்.
இக்கலந்துரையாடலைத் தொடங்கி வைத்துப் பேசிய ஐக்கிய நாடுகள் சபைக்கான இந்திய நிரந்தரப் பிரதிநிதி தூதர் ஹரிஷ் பார்வதனேனி, இந்திய விடுதலைப் போராட்டத்தில் அண்ணல் மகாத்மா காந்தியின் கதர் ஆடை இயக்கம் எவ்வாறு சுயசார்பு மற்றும் கண்ணியத்தின் அடையாளமாகத் திகழ்ந்தது என்பதை உலக அரங்கில் விரிவாக எடுத்துரைத்தார். அதனைத் தொடர்ந்து பேசிய மாலியின் நிரந்தரப் பிரதிநிதி தூதர் இசா கோன்ஃபோரு, மாலி நாட்டின் கிராமப்புற வாழ்வாதாரத்திற்கும் அந்நாட்டுப் பொருளாதார வளர்ச்சிக்கும் பருத்தித் தொழில் எவ்வாறு மிக முக்கியத் தூணாக விளங்குகிறது என்பதை விளக்கினார். அவரைத் தொடர்ந்து பேசிய இந்திய நாடாளுமன்ற உறுப்பினர் அசித் குமார் மால், மேற்கு வங்காளத்தின் போல்பூர் பகுதியில் உள்ள பாரம்பரிய ‘காந்தா’ (Kantha) தையல் கலை மூலம் பெண்கள் தங்களது வாழ்வாதாரத்தை எப்படி உயர்த்துகிறார்கள் என்பதைக் குறிப்பிட்டு, கைவினைஞர்களுக்கான நியாயமான ஊதியம், எளிதான அரசு கடன் மற்றும் சந்தை வாய்ப்புகள் குறித்துப் பேசினார்.
இதனைத் தொடர்ந்து, உலக அரங்கில் தமிழகத்தின் பெருமையை நிலைநாட்டும் வகையில் உரையாற்றிய தமிழக ராஜ்யசபா எம்பி, எல்.கே. சுதீஷ் பருத்திப் பின்னலாடை (Knitwear) மற்றும் ஆயத்த ஆடை உற்பத்தியில் தமிழகத்தின் உலகளாவிய அனுபவத்தையும், அதில் சிறு, குறு நிறுவனங்கள் மற்றும் திறமையான தொழிலாளர்களின் அளப்பரிய பங்களிப்பையும் பெருமிதத்துடன் எடுத்துரைத்தார். மேலும், மத்திய அரசின் ‘பிரதமர் மித்ரா’ (PM MITRA) திட்டத்தின் கீழ் தமிழகத்தில் அதிநவீன வசதிகளுடன் உருவாக்கப்பட்டு வரும் ஒருங்கிணைந்த மாபெரும் ஜவுளிப் பூங்கா (Integrated Textile Park) குறித்தும், அங்கு மேம்படுத்தப்பட்டு வரும் ஜவுளி பதப்படுத்துதல் (Textile Processing) தொழில்நுட்பங்கள் குறித்தும் விவரித்தார். மிக முக்கியமாக, ஜவுளி பதப்படுத்துதலின் போது ஏற்படும் கழிவுநீரைச் சுற்றுச்சூழல் பாதிக்காத வண்ணம் எவ்வாறு முழுமையாகச் சுத்திகரித்து, மறுசுழற்சி (Wastewater Recovery and Reuse) செய்ய வேண்டும் என்பதற்கான தமிழகத்தின் சுற்றுச்சூழல் விழிப்புணர்வு மாதிரியையும் ஐநா சபையில் அவர் தெளிவாக விளக்கிப் பாராட்டுகளைப் பெற்றார்.
