தமிழ்த் திரையுலகின் உச்ச நட்சத்திரமான நடிகர் ரஜினிகாந்திற்கு சொந்தமான, கடந்த 1990-களில் கட்டப்பட்டு,சென்னை கோடம்பாக்கத்தின் புகழ்பெற்ற அடையாளங்களில் ஒன்றாக மாறியுள்ள ராகவேந்திரா திருமண மண்டபம் விரைவில் நவீன வசதிகளுடன் கூடிய நட்சத்திர ஓட்டலாக மாற்றப்பட உள்ளதாகக் கோலிவுட் மற்றும் ரியல் எஸ்டேட் வட்டாரங்களில் பரபரப்புத் தகவல் பரவி வருகிறது.
கடந்த 1990-களில் ரஜினிகாந்தால் கட்டப்பட்ட இந்த மண்டபம், சினிமா பிரபலங்களின் திருமணங்கள், குடும்ப விழாக்கள் மட்டுமின்றி, ரஜினிகாந்தின் முக்கிய அரசியல் முன்னெடுப்புகள் மற்றும் வரலாற்றுச் சிறப்புமிக்க ரசிகர் சந்திப்புகளின் முதன்மை கேந்திரமாக திகழ்ந்து வந்த இந்த மண்டபம், ரஜினி ரசிகர்களுக்கு எப்போதுமே ஒரு உணர்வுப்பூர்வமான நினைவுக் கோட்டையாகவே பார்க்கப்பட்டு வருகிறது.சென்னையின் இதயப் பகுதியான கோடம்பாக்கம் மற்றும் அதன் சுற்றுவட்டாரப் பகுதிகளில் நட்சத்திர அந்தஸ்து கொண்ட உயர்தர தங்கும் விடுதிகள் மற்றும் நவீன உணவகங்களுக்கான தேவை நாளுக்கு நாள் அதிகரித்து வருகிறது.
இதனைக் கருத்தில் கொண்டு, பரந்து விரிந்த பரப்பளவைக் கொண்ட இந்த வளாகத்தை நவீன உள்கட்டமைப்பு, சொகுசு அறைகள் மற்றும் சர்வதேச தரத்திலான உணவக வசதிகளுடன் கூடிய பிரம்மாண்ட நட்சத்திர ஹோட்டலாக மறுவடிவமைப்பு செய்வதற்கான பூர்வாங்க நகர்வுகள் தொடங்கப்பட்டுள்ளதாகக் கூறப்படுகிறது.இதற்கான விரிவான திட்ட வரைவுகள் மற்றும் சட்டரீதியான நடவடிக்கைகள் குறித்து ஆலோசிக்கப்பட்டு வருவதாகத் தகவல் வெளியாகியுள்ள போதிலும், இது தொடர்பாக நடிகர் ரஜினிகாந்த் தரப்பில் இருந்தோ அல்லது அவரது குடும்ப நிர்வாகத் தரப்பில் இருந்தோ இதுவரை எந்தவித அதிகாரப்பூர்வ அறிவிப்பும் வெளியிடப்படவில்லை.
