விஜய் ஆண்டனி நடிப்பில், மு. மாறன் எழுத்து மற்றும் இயக்கத்தில் பெரும் எதிர்பார்ப்பை ஏற்படுத்தியுள்ள ‘அப்பா குட்டி’ திரைப்படம், வரும் நவம்பர் 6, 2026 அன்று தீபாவளி சிறப்பு வெளியீடாக உலகம் முழுவதும் திரையரங்குகளில் வெளியாகவுள்ளது.
குடும்ப உணர்வுகள், விறுவிறுப்பான ஆக்ஷன் காட்சிகள், மற்றும் அனைத்து தரப்பு ரசிகர்களையும் கவரும் பொழுதுபோக்கு அம்சங்கள் எனத் தீபாவளி கொண்டாட்டத்திற்கான ஒரு முழுமையான பக்கா கமர்ஷியல் திரைப்பட அனுபவத்தை வழங்க இப்படம் தயாராகி வருகிறது. தந்தைக்கும் மகளுக்கும் இடையிலான அளவிலா அன்பையும், பிரிக்க முடியாத பாசப் பிணைப்பையும் மையமாகக் கொண்டு, உணர்வுப்பூர்வமான கதைக்களத்துடன் வணிகரீதியான அம்சங்களையும் இணைத்து அனைத்து வயதினரையும் கவரும் குடும்பத் திரைப்படமாக இப்படம் உருவாகியுள்ளது.
ஏற்கெனவே வெளியிடப்பட்ட இப்படத்தின் இரண்டாவது தோற்றப் போஸ்டரில் (Second Look Poster), விஜய் ஆண்டனியுடன் ஒரு குட்டிச் சிறுமி இடம்பெற்றிருந்தார். தந்தை – மகள் உறவை மிகவும் அன்பான எமோஷனல் வெளிப்பாட்டால் உணர்த்தும் வகையில் அமைந்த அந்தப் போஸ்டர், ரசிகர்களின் கவனத்தை ஈர்த்துப் படத்தின் மீதான எதிர்பார்ப்பை பல மடங்கு அதிகரித்தது. தற்போது இப்படத்தின் ஒட்டுமொத்த இறுதிக்கட்ட தயாரிப்புப் பணிகள் முழுமையாக நிறைவடைந்துள்ள நிலையில், வெளியீட்டுக்கு முந்தைய விரிவான விளம்பரப் பணிகளை விறுவிறுப்பாகத் தொடங்க படக்குழுவினர் முழு வீச்சில் தயாராகி வருகின்றனர்.
இப்படத்தில் விஜய் ஆண்டனியுடன் ப்ரீத்தி அஸ்ரானி, பேபி லிதன்யா, பகவதி பெருமாள் (பக்ஸ்), ஹரிப்பிரியா இசை, அருவி மதன், சித்ரா லட்சுமணன், ஸ்ரீஜா ரவி, வேட்டை முத்துக்குமார், ஜென்சன் திவாகர், முருகானந்தம், மூணார் ரமேஷ், லிஸ்ஸி ஆண்டனி, குமார் நடராஜன், விஜயன், பிரவீணா, ஹரிதா மற்றும் ஹரிப்பிரியா உள்ளிட்ட ஒரு பெரிய நட்சத்திர பட்டாளமே முக்கியக் கதாபாத்திரங்களில் நடித்துள்ளனர். விளக்குகளின் திருவிழாவான தீபாவளியைக் குடும்பத்தினருடன் கொண்டாட ரசிகர்கள் தயாராகி வரும் நிலையில், விஜய் ஆண்டனியின் ‘அப்பா குட்டி’ திரைப்படம் அந்தக் கொண்டாட்டத்தில் அதிரடியான ஆக்ஷன், பொழுதுபோக்கு மற்றும் உருக வைக்கும் பாச உணர்வுகளைக் கூடுதலாகச் சேர்க்க தியேட்டர்களுக்கு வரவுள்ளது.
