மைக்கேல் ராயப்பன் தயாரிப்பில் சிம்பு நடிப்பில் கடந்த 2016-ல் வெளியான படம் அன்பானவன், அடங்காதவன், அசராதவன். இப் படத்தில் நடிக்க சிம்புக்கு 8 கோடி ரூபாய் சம்பளம் பேசப்பட்டு, 1 கோடியே 51 லட்சம் ரூபாய் முன்பணமாக வழங்கப்பட்டது. இதில் சம்பள பாக்கி 6 கோடியே 48 லட்சம் ரூபாயை பெற்றுத்தரக் கோரி நடிகர் சிம்பு, நடிகர் சங்கத்தில் புகார் மனு கொடுத்திருத்திருந்தார்.
அதேபோல் , ‘அஅஅ’ படத்தால் தனக்கு ஏற்பட்ட இழப்பை நடிகர் சிம்புவிடம் இருந்து வசூலித்து தரக் கோரி தயாரிப்பாளர் மைக்கேல் ராயப்பனும் தயாரிப்பாளர் சங்கத்தில் புகார் அளித்திருந்தார்.
இந்நிலையில், சமூக வலைதளங்களில் தனக்கு எதிரான அவதூறு கருத்துக்களை பதிவிட்டதாக கூறி, மைக்கேல் ராயப்பனுக்கு எதிராக ரூ.1 கோடி கேட்டு மான நஷ்ட வழக்கை நடிகர் சிம்பு சென்னை உயர் நீதிமன்றத்தில் தொடர்ந்தார். இவ் வழக்கில், தயாரிப்பாளர் சங்கம், நடிகர் சங்கம், நடிகர் விஷால் ஆகியோரை எதிர்மனுதாரராகவும் சேர்த்திருந்தார்.இந்நிலையில்,
இவ் வழக்கு நீதிபதி வேல்முருகன் முன்பு இன்று மீண்டும் விசாரணைக்கு வந்தது.வழக்கை விசாரித்த நீதிபதி, 1,080 நாட்களாகியும், இந்த வழக்கில் எழுத்துப்பூர்வமான வாதத்தை தாக்கல் செய்யாததால், திரைப்பட தயாரிப்பாளர் சங்கத்திற்கு ரூ.1 லட்சம் அபராதம் விதித்து உத்தரவு பிறப்பித்தார்.
இந்த அபராத தொகையை வரும் 31-ம் தேதிக்குள் பதிவாளர் அலுவலகத்தில் செலுத்த வேண்டும் என உத்தரவிட்டு விசாரணையை, ஏப்ரல் 1-ம் தேதிக்கு தள்ளிவைத்தார்.
