ஜெ.எஸ்.எம். பிக்சர்ஸ் சார்பில் ஏ.ஆர்.ஜாபர் சாதிக் மற்றும் எம்பரர் என்டர்டெயின்மென்ட் சார்பில் இர்ஃபான் மாலிக்கும் இணைந்து தயாரித்துள்ள திரைப்படத்திற்கு,கடந்த 1995ம் ஆண்டு அரவிந்த் சாமி, அனுஹாசன் நடிப்பில், சுகாசினி மணிரத்னம் இயக்கி வெளியான ‘இந்திரா’படத்தின் தலைப்பையே சூட்டியுள்ளனர்.
இப்படத்தின் மூலம் ஐரா, நவரசா போன்ற படங்களில் பணியாற்றிய சபரீஷ் நந்தா, தற்போது இயக்குனராக அறிமுகமாகிறார். வசந்த் ரவி கதாநாயகனாக நடிக்கும் இப்படத்தில் இவருக்கு ஜோடியாக மெஹ்ரின் பிர்சாடா நடிக்கிறார். ‘இவர்களுடன் விஸ்வாசம்’ படத்தின் மூலம் பிரபலமான அனிகா சுரேந்திரன் இந்த படத்தில் முக்கிய கதாபாத்திரத்தில் நடிக்கிறார்.
நடன இயக்குனர் கல்யாண் மற்றும் தெலுங்கு நடிகர் சுனில் உள்ளிட்டோர் முக்கிய கதாபாத்திரங்களில் நடிக்கின்றனர். தற்போது இப்படத்தின் பர்ஸ்ட் லுக் போஸ்டரை படக்குழுவினர் வெளியிட்டுள்ளனர்.