அறிமுக இயக்குநர் அபிலாஷ் ஜி. தேவ் இயக்கத்தில் உருவாகியுள்ள ‘தாய்நிலம்’ திரைப்படம், திரையரங்குகளில் வெளியாவதற்கு முன்பாகவே சர்வதேசத் திரைப்பட விழாக்களில் அதிகாரப்பூர்வமாகத் தேர்வு பெற்று (Official Selection) உலகளாவிய கவனத்தை ஈர்த்துள்ளது.
கனடாவின் டொராண்டோ தமிழ் திரைப்பட விழா (Toronto Tamil Film Festival), சுவீடனின் லுலியோ சர்வதேச திரைப்பட விழா (Luleå International Film Festival) மற்றும் பெல்ஜியத்தின் கதார்சிஸ் சர்வதேச திரைப்பட விழா (Catharsis International Film Festival) ஆகிய மதிப்புமிக்க உலகளாவிய மேடைகளில் இப்படம் திரையிடப்பட்டுப் பாராட்டுகளைப் பெற்றுள்ளது படக்குழுவினருக்குப் பெருமிதத்தை ஏற்படுத்தியுள்ளது.
இலங்கைத் தமிழ் மக்களின் வாழ்வில் ஏற்பட்ட ஆழமான இழப்புகள் மற்றும் இதுவரை திரையில் அதிகம் பேசப்படாத வலிகள் நிறைந்த பல்வேறு வாழ்வியல் அம்சங்களை இத்திரைப்படம் தனது அழுத்தமான கதையின் வழியாகப் பார்வையாளர்கள் முன் வைக்கிறது. குறிப்பாக, தங்களின் சொந்த மண்ணை அநியாயமாக இழந்துவிட்டு, முற்றிலும் புதியதொரு சூழலில் தங்களது வாழ்க்கையை மீண்டும் புதிதாகக் கட்டமைக்கப் போராடும் மனிதர்களின் தவிப்பான மனநிலை, அவர்களது எளிய எதிர்பார்ப்புகள், பாசப் பிணைப்புகள் மற்றும் எதிர்காலக் கனவுகள் ஆகியவற்றை மையப்படுத்தி இப்படைப்பு மிக நேர்த்தியாக உருவாகியிருப்பது தற்போது வெளியாகியுள்ள டிரெய்லர் மூலம் தெளிவாகத் தெரியவருகிறது.
இப்படத்தில் டாக்டர் அமர் ராமச்சந்திரன் மற்றும் நேகா அமர் ஆகியோர் முதன்மையான கதாபாத்திரங்களைத் தாங்கி தங்களின் எதார்த்தமான நடிப்பை வெளிப்படுத்தியுள்ளனர். இவர்களுடன் மறைந்த பிரபல நடிகர் பாலாசிங், தீபக் பிரபாகர், பத்மஜா, நிமிஷா நம்பியார், குரு தட்சணா, தளபதி ஆனந்த் மற்றும் சரவணன் சொக்கம்பட்டி ஆகியோர் கதையின் முக்கியப் பாத்திரங்களில் இணைந்து நடித்துள்ளனர். தொழில்நுட்ப ரீதியாக, பிரசாந்த் பிரணவமின் எதார்த்தமான ஒளிப்பதிவும், ஔசேப்பச்சனின் ஆன்மாவைத் தொடும் பாடல்கள் மற்றும் பின்னணி இசையும் படத்திற்கு மிகப்பெரிய பலமாக அமைந்துள்ளன. இவர்களுடன் தீஜோ பி. வர்கீஸின் படத்தொகுப்பு, கைலாஸ் திரிப்பூனிதுறையின் கலை இயக்கம் மற்றும் ராஜாகிருஷ்ணனின் ஒலிச்சேர்க்கை (Mixing) ஆகியவை இணைந்து இந்தத் திரைப்படத்தை ஒரு சர்வதேசத் தரத்திலான உணர்வுப்பூர்வமான காவியமாக மாற்றியுள்ளன.
