ஸ்டுடியோக்ரீன் ப்ரொடக்ஷன் பட நிறுவனம் சார்பில் கே.ஈ.ஞானவேல்ராஜா, ராஜேஷ் இயக்கத்தில், சிவகார்த்திகேயன் நடிக்கும் புதிய படத்தினை தயாரிக்கிறார். எஸ்.கே.13 என தற்காலிகமாக பெயரிடப்பட்டுள்ள இந்த படத்தின் பூஜை இன்று காலை சம்பிரதாய பூஜையுடன் துவங்கியது. 
இப் படத்தை பற்றி தயாரிப்பாளர் கே.ஈ.ஞானவேல்ராஜா கூறியதாவது, “ராஜேஷ், சிவகார்த்திகேயன் போன்ற ஆளுமைகள் ஒரு படத்தில் இணையும்போது, அந்த படம் என்ன மாதிரி படமாக இருக்கும் என ஆராய வேண்டியதில்லை. மேலும்இயக்குனர் ராஜேஷ் படங்களின் கதாநாயகர்களின் கதாபாத்திர சித்தரிப்பு, ரசிகர்கள் மற்றும் குடும்பத்தினர் எதிர்பார்ப்புக்கு ஏற்ற வகையில் எப்போதும் அமையும். 
எனவே சிவகார்த்திகேயன் படத்தில் ரசிகர்கள் என்ன ரசிப்பார்களோ அதை நிச்சயம் ராஜேஷ் இந்த படத்தில் கொடுப்பார் என நம்புகிறேன். மேலும் சிவகார்த்திகேயன் பொழுதுபோக்கு படங்களை கொடுக்கும் ஒரு நாயகனாக மட்டுமல்லாமல் தயாரிப்பாளர், விநியோகஸ்தர்கள், திரையரங்க உரிமையாளர்கள் ஆகியோரும் பயனடைய வேண்டும் என்று நினைப்பவர். 
எனவே இந்த மாதிரி நேர்மறையான எண்ணங்களை உடைய மனிதர்களோடு இணைவதில் மகிழ்ச்சி அடைகிறேன், ரசிகர்கள் ஒரு நல்ல பொழுதுபோக்கு படத்தை எதிர்பார்க்கலாம். மற்ற நடிகர், நடிகையர், தொழில்நுட்ப கலைஞர்கள் பற்றி கூடிய விரைவில் அறிவிப்பு வெளியாகும்” என்கிறார்.
