சிறுநீரக பிரச்சனை காரணமாக கடந்த சில மாதங்களாக மருத்துவமனையில் சிகிச்சை பெற்று வந்த பிரபல இயக்குனர் டிபி கஜேந்திரன் இன்று அவரது வீட்டில் காலமானார்.அவருக்கு வயது 68.
தமிழ்நாடு முதலமைச்சர் மு.க. ஸ்டாலினின் கல்லூரி தோழர் தான் டி.பி. கஜேந்திரன் என்பது குறிப்பிடத்தக்கது.
டி.பி. கஜேந்திரன் மறைவு குறித்து தமிழ்நாடு முதல்வர் மு.க. ஸ்டாலின் விடுத்த இரங்கல் செய்தியில் கூறியுள்ளதாவது,
‘பிரபல இயக்குநரும், நடிகரும், எனது கல்லூரித் தோழருமான இனிய நண்பர், திரு. டி.பி.கஜேந்திரன் அவர்கள் மறைவுற்ற செய்தி, மிகுந்த வருத்ததையும், அதிர்ச்சியையும் அளிக்கிறது. எங்க ஊரு காவல்காரன், பாண்டி நாட்டுத் தங்கம் போன்ற பல வெற்றிப் படங்களை இயக்கியதுடன், பல்வேறு திரைப்படங்களில் நடிகராகவும் தோன்றி, கலையுலகிற்கு தமது சிறப்பான பங்களிப்பை வழங்கி வந்தவர்.கடந்த 2021 ஆம் ஆண்டு செப்டம்பர் மாதம் அவர் உடல்நலக் குறைவால் பாதிக்கப்பட்டிருந்த நிலையில் நேரில் சென்று நலம் விசாரித்து வந்தேன். தற்போது எதிர்பாராத விதமாக அவர் உடல்நலக் குறைவால் காலமாகி இருப்பது வேதனையளிக்கிறது. திரு. டி.பி. கஜேந்திரனை இழந்து வாடும் அவரது குடும்பத்தினர், திரையுலக நண்பர்கள் மற்றும் ரசிகர்களுக்கு எனது ஆழ்ந்த இரங்கலையும், ஆறுதலையும் தெரிவித்துக் கொள்கிறேன்.” இவ்வாறு முதல்வர் தெரிவித்துள்ளார்.
தூத்துக்குடியை சேர்ந்த இயக்குனர் டி.பி.கஜேந்திரன், சிறுவயதிலேயே சென்னையில் குடியேறி குடும்பத்தினருடன் வசித்து வந்தார். பின்னர் சினிமா மீதுள்ள ஆர்வத்தில் தமிழ் திரையுலகில் முன்னணி இயக்குனர்களாக விளங்கிய கே.பாலச்சந்தர், விசி, ராமநாராயணன் ஆகியோரிடம் உதவி இயக்குனராக பணியாற்றினார்.
1985ஆம் ஆண்டு வெளியான சிதம்பர ரகசியம் படத்தில் இவர் நடிகராக அறிமுகமானார். 1988இல் ‘வீடு மனைவி மக்கள்’ என்ற படம் மூலம் இயக்குநர் அவதாரம் எடுத்தார். இவர், சீனா தானா, பட்ஜெட் பத்மநாபன், மிடில் கிளாஸ் மாதவன், பந்தா பரமசிவம் ,எங்க ஊரு காவல்காரன், பாண்டி நாட்டு தங்கம், நல்ல காலம் பொறாந்தாச்சு, பாட்டு வாத்தியார், உள்ளிட்ட படங்களை இயக்கியுள்ளார். காமெடி நடிகராகவும் வலம் வந்த டிபி கஜேந்திரன், மினிமம் கியாரண்டி இயக்குநர் என்ற பெயருக்கு சொந்தமானவர்.
டிபி கஜேந்திரன் இயக்கத்தில் கடைசியாக 2010ல் மகனே என் மருமகனே திரைப்படம் வெளியானது. இதில் மறைந்த நடிகர் விவேக் முன்னணி கதா பாத்திரத்தில் நடித்திருந்தார்.என்பது குறிப்பிடத்தக்கது.நேற்று பழம்பெரும் பாடகி வாணிஜெயராம் உயிரிழந்த நிலையில் இன்று இயக்குனர் டி.பி.கஜேந்திரன் மறைவு திரையுலகினர் மத்தியில் கடும் சோகத்தை ஏற்படுத்தியுள்ளது
